Ташқи меҳнат миграцияси агентлиги фуқароларни 3-6 минг доллар эвазига Японияга жўнатаётган тил марказларидан огоҳлантирди.
Хабарга кўра, сўнгги йилларда айрим касб ва япон тили марказлари, фирма ва шахслар томонидан “Японияда қонуний ишлаш, бизнес-ҳамкор топиш, ойига 3-5 минг АҚШ доллари топиш, ишчи виза муддати ва мақомини қийинчиликларсиз узайтириш имкониятлари мавжуд”, деган асоссиз маълумотлар берилиб, 3-6 минг АҚШ доллари эвазига фуқароларни Японияга жўнатиш ҳолатлари кузатилмоқда.
Хусусан, фуқаролар Японияга 3 ойлик бизнес виза билан “сохта тадбиркор“ сифатида кириб бориб, улар томонидан маҳаллий қонунчиликни бузиш, ноқонуний меҳнат билан шуғулланиш ҳамда Японияда “қочоқ” мақомини олиш каби ҳолатлар ҳам учрамоқда.
Қайд этилишича, ушбу марказ, фирма ва шахсларнинг ноқонуний фаолияти натижасида Японияга кириб бориш вақтида аксарият юртдошларимиз иммиграция органлари ходимлари томонидан ушланиб, Ўзбекистонга депортация қилинмоқда.
“Шу муносабат билан, юртдошларимизга хорижда “қочоқ” мақомини олишга уриниш учун жавобгарлик мавжудлигини эслатиб ўтамиз ҳамда ёлғон маълумотлар ва осон иш таклифларига ишонмасликни ва уларнинг тарқалишига йўл қўймасликларини сўраймиз”, — дея огоҳлантирган агентлик.
Изоҳ (0)