Францияда пенсия ёшини оширишга қарши намойишларда 400 дан ортиқ полициячи жабрланди (видео)
Францияда пенсия ислоҳотига қарши 23 март кунги норозилик намойишлари чоғида юз берган тартибсизликларда 457 киши ҳибсга олинди, деб хабар бермоқда мамлакат ички ишлар вазирлиги.
“Франция бўйлаб 457 нафар одам ҳибсга олинган”, — деди Франция ички ишлар вазири Жеральд Дарманин SNews телеканалида.
Шунингдек, у намойишчилар билан тўқнашувлар чоғида 441 нафар полиция ва жандармерия зобити яраланганини айтди. Дарманиннинг қўшимча қилишича, Парижда “шаҳар мулки ва чиқинди контейнерларига ўт қўйиш билан боғлиқ 933 та ҳолат” қайд этилган.
Франция ички ишлар вазирлиги раҳбари норозилик ҳаракатининг “радикаллашуви”дан хавотир билдирди. Унинг сўзларига кўра, шу ҳафта Франция Миллий полициясининг Бош инспекцияси акциялар давомида намойишчиларнинг ҳаракатлари билан боғлиқ 11 та текширув бошлаган.
23 март куни кечқурун Парижда ва Франциянинг бошқа бир қатор шаҳарларида пенсия ислоҳотига қарши оммавий норозилик намойишлари ўтказилди ва бу тартибсизликларга айланиб кетди. Намойишчилар ҳуқуқ-тартибот ходимларига тош, қўлбола портловчи модда солинган шишалар улоқтирди. Бордода намойишчилар шаҳар мериясининг кириш қисмига ўт қўйди, Тулуза ва Лионда турли портлашлар уюштирди.
16 март куни Франция ҳукумати 49.3 конституциявий моддадан фойдаланган ҳолда, Миллий ассамблеяда овозга қўймасдан, пенсия ёшини 62 ёшдан 64 ёшга оширишга қарор қилганди. Бунга жавобан парламент қуйи палатасининг мухолифатдаги фракциялари 20 март куни ҳукуматга икки марта ишончсизлик вотумини овозга қўйди, уларнинг ҳар иккиси ҳам зарурий кўпчилик овозни ололмади.
Бундан ташқари, бош вазир Элизабет Борнни ишдан бўшатиш учун овоз беришда тўққизта овоз етмади. Ижроия ҳокимиятига ишончсизлик билдиришга уринишлар муваффақиятсизлиги натижасида пенсия ислоҳоти Миллий Ассамблея томонидан қабул қилинган деб ҳисобланмоқда.
20 март куни кечқурун Париж ва бошқа ҳудудларда режалаштирилмаган норозилик намойишлари бошланди.
