Хитой миллиардерларининг бойлиги камаймоқда. Бунга қандай омиллар таъсир қилди?
Дунё бўйлаб 2022 йилда 400 дан ортиқ одам миллиардер мақомини йўқотди, уларнинг ярми Хитойга тўғри келади. Reuters агентлиги хитойликлар камбағаллашаётгани сабабини келтириб ўтди.
Келтирилишича, дунёнинг энг бадавлат кишилари бойлигининг камайиши глобал миқёсда пул-кредит сиёсатининг кескинлашуви, COVID-19 пандемияси ва Пекиннинг йирик технология компанияларига қарши кескин чоралари билан боғлиқ. Hurun Global Rich List 2023 маълумотларига кўра, 445 киши миллиардерлар рўйхатидан чиқиб кетган, улардан 229 нафари эса Хитойдан. Худди шу даврда 69 нафар янги хитойлик миллиардерлар пайдо бўлган.
“Дунёда миллиардерлари сони 8 фоизга камайди, уларнинг умумий бойлиги эса 10 фоизга пастлади”, — дейди Hurun Report асосчиси ва раҳбари Руперт Ҳугеверф.
Унинг қўшимча қилишича, рўйхатга бир йил аввалги 3381 кишига нисбатан 3112 киши киритилган. Энг кўп миллиардерлар Хитой (969 киши) ва АҚШда (691 киши). Икки давлат биргаликда дунёдаги энг бой одамларнинг 53 фоизини ташкил қилади. Учинчи ўринни 187 миллиардер билан Ҳиндистон эгаллаган.
Hurun Global Rich List 2023 рўйхатидаги дастлабки уч ўринни LVMH бош директори Бернард Арно, SpaceX ва Tesla бош директори Илон Маск, Hermes меросхўри Бертран Пюҳ ва унинг оиласи эгаллаган. Хитой гиганти Alibaba Group Holding асосчиси Жек Ма Пекиннинг тартибга солиш чоралари туфайли бир йил аввалги 34-ўриндан 52-ўринга тушиб кетган.
Хитой регуляторлари Alibaba’нинг онлайн тўловлар бўйича шўба корхонаси Аnt Group’нинг фонд бозорига 34 млрд доллар киритишини блоклаган. Бундан ташқари Alibaba’га ўзининг баъзи медиаактивларини, жумладан, Гонконгнинг South China Morning Post газетасини сотиш буюрилган.
