Ўзбекистон халқ артисти Ражаб Адашев “Дарё” интернет-нашрига эксклюзив интервью берди. Интервьюни “Дарё” мухбири Феруз Муҳаммад ташкиллаштирди.
“Мен учун йиғлаш жуда оғир”
— Ўта истеъдодли актёрларда рол ижро этаётган пайтида йиғи келади, ўзим ҳам беш кетаман шундай актёрларга. Менга эса қийин, мен йиғлай олмайман. Ўта исдеъдодли актёр эмаслигимни тан олишга мажбур бўладиган жойим шу. Кимнингдир ўлганини хотирлайман ёки энг яқин инсонимни касал ҳолда кўз олдимга келтириб, ўша вазиятда кўзимдан ёш чиқарганман. Мен учун йиғлаш жуда оғир.
Кино у пайтда битта камерада, тасмада олинарди. Ҳозирги видеоларда камида 5 та дубль олиняпти, бир дубль икки-уч марта такрорланиши ҳам мумкин. Кўз ёши эса бир марта келади. Уни иккинчи дублда ҳам, учинчи дублда ҳам чиқариш керак. Ҳар қандай актёрга ҳам қийин, энг маҳоратли актёрга ҳам бу жараён қийинчилик туғдиради. Менга эса икки ҳисса қийин. Ҳалиги ўлган одамни яна ўлдириш, касал ётган одамни яна касал ҳолда тасаввур қилиш жуда оғир. Шунинг учун баъзида “Меникини битта дублда олинглар” деб айтиб қўяман.
“Агар дубль бештагача чўзилса, режиссёрлар актёрларни сўкарди”
— “Абдуллажон” фильмида мен ва Тўти Юсупова билан боғлиқ саҳналар фақат битта дублда олинган. Чунки у чет элдан олиб келинган “Кодак” русумли қиммат тасмага туширилган. Россиядан чиқарилган плёнкаларда 3-4 дублгача олинаверарди. Агар дубль бештагача чўзилса, режиссёрлар актёрларни сўкарди. “Абдуллажон”даги бола билан боғлиқ саҳналарга иккита дублга рухсат берилган эди, болалар учун имтиёз бор эди. Хато қилишга ҳаққимиз йўқ эди. Токи режиссёр ўзи қониқмагунча фақат репитиция ва машқ қилардик.
Маълумот учун, Ражаб Адашев 1944 йил 15 июль куни Самарқанд вилояти Ургут туманида туғилган. Островский номидаги Тошкент театр ва санъат институтининг актёрлик факультетини тамомлаган. Кинодаги фаолияти 1964 йилдан бошланган. 100 дан ортиқ фильмларда рол ижро этган.
Ражаб Адашев 1993 йилда “Абдуллажон” фильмидаги “Энг яхши эркак роли учун” мукофот, 1997 йилда Ўзбекистонда хизмат кўрсатган артист, 2010 йилда Ўзбекистон халқ артисти, 2021 йилда “Дўстлик” ордени, 2022 йилда Санъат ва маданият фидокори”, “Меҳнат фахрийси”, “Кинематография фидокори” каби унвон ва мукофотларга муносиб кўрилган.
Батафсил репортажни қуйида томоша қилишингиз мумкин.
Изоҳ (0)