Европага Украина учун ўқ-дорилар ишлаб чиқаришда порох етишмаяпти — Financial Times

Украина Қуролли кучлари учун снарядлар етказиб бериш ҳажмини оширишга ваъда берган Европа Иттифоқи давлатлари ишлаб чиқаришда катта қийинчиликларни бошдан кечирмоқда. Урушдан олдинги вазиятга нисбатан бир неча баравар кўп ўқ-дорилар ишлаб чиқариш учун уларга портловчи моддалар ва порохлар етишмаяпти. Financial Times’нинг ёзишича, буларни ишлаб чиқаришни тезда йўлга қўйиш имконсиз.

Қайд этилишича, шу сабабли Украинага миллионта снаряд етказиб бериш режаси хавф остида қолган, бу мамлакат қуролли кучларига бир неча ойга етиши керак эди. Шу билан бирга, Европа томонидан ўқ-дориларни етказиб бериш мажбурияти Киевни эндиликда қаноатлантирмаяпти: украин қўшинларига бутун мамлакат ҳудудини муваффақиятли озод этиш учун ойига 600 мингтагача снаряд талаб этилади, амалда эса фақат 120 минг снаряд етказиб берилмоқда.

Россия армиясида снарядлар етишмовчилиги юзага келгани ҳақида ғарб разведкаси ва экспертлари 2022 йилнинг кузида хабар берганди. Донбассга ёзда уюштирилган ҳужумда Россия Қуролли кучлари жуда кўп ўқ-дори сарфлаб юборган: армия кадрлар етишмовчилигини бошдан кечирган, шу сабабли Украина позицияларини кичик кучлар билан эгаллаб олиш умидида кучли артиллерия ўқлари ёғдирилган. Бу эса захираларнинг тезда якунланишига олиб келган. Россия ҳарбийлари ёзда суткасига 30 минг снаряд ишлатган бўлса, қишда бу кўрсаткичлар 10 мингни ташкил этган.

Россияда снарядлар ишлаб чиқариш ҳажми ортмоқда, аммо қандай жадалликда экани номаълум. Экспертларнинг баҳолашича, урушга қадар мамлакатда 2 мингга яқин снаряд ишлаб чиқарилган, шу боисдан дефицитни енгиб ўтиш учун ишлаб чиқариш ҳажмини бир неча баробарга ошириш талаб этилади.

НАТО эса ишлаб чиқаришни ошириш билан бирга, Украина Қуролли кучларига камроқ снаряд сарфлаб, ғалаба қозониш имконини берадиган тактикани ўйлаб топиш билан шуғулланмоқда.

Financial Times’нинг ёзишича, муаммо снарядлар учун асосий материаллар — порох ва портловчи моддалар, шунингдек, уларни ишлаб чиқариш учун компонентлар, масалан, нитротцеллюлозанинг йўқлигидадир. Европалик қуролсозларга кўра, ушбу материалларни ишлаб чиқаришни тезлаштириш имконсиз. Чунки бу каби материалларни ишлаб чиқарадиган заводларни қуришга камида 3 йил вақт кетади.

Дефицит, шунингдек, кичик ҳажмли снарядларни ишлаб чиқаришга ҳам таъсир кўрсатмоқда: порох етишмовчилиги сабаб Европада снаряд ишлаб чиқариш нархи уруш бошидан бери 20 фоизга қимматлашган. Ҳозирда 155 миллиметрли снаряд нархи 850 еврони ташкил этмоқда.