Футбол бўйича 20 ёшгача бўлган футболчилар ўртасидаги 2023 йилги Осиё Кубоги ярим финал ўйинлари 15 март, чоршанба куни ўтказилади.
Ўзбекистон U-20 терма жамоаси финал йўлланмаси учун Жанубий Кореяга қарши баҳс олиб боради. Учрашув Тошкентдаги “Бунёдкор” стадионида ўтказилади ва 19:00 да бошланиши кўзда тутилган.
Мазкур ўйин чипталари муддатидан аввал сотиб бўлингани маълум бўлди. Онлайн харид қилиш мўлжалланган iTicket платформасида чипталар сотиб бўлингани ҳақида маълум қилинган.
“Дарё” чипталар офлайн режимда ҳам сотувга чиқарилган ёки чиқарилмагани билан қизиқди. Маълум бўлишича, чипталар савдоси тўлиқ iTicket порталига берилган, ўйин чипталари фақат платформа сайти ва унга тегишли кассаларда сотилган.
Эслатиб ўтамиз, Тошкентда ўтган У-23 Осиё Кубоги—2022 финали доирасида кечган Ўзбекистон ва Саудия Арабистони терма жамоалари ўртасидаги баҳс олдидан “Бунёдкор” стадиони чиптахонаси атрофида кўплаб мухлислар тўплаган ва тартибсизликлар юзага келганди. Кейинроқ ЎФА бу борада баёнот берганди.
Изоҳ (0)