Тошкент аэропортида самолёт фарроши йўловчи сумкасидаги пулларни ўзлаштириб олди. Бу ҳақда Транспорт ва туризм объектларида хавфсизликни таъминлаш департаменти хабар берди.
Маълум қилинишича, мазкур ҳолат 10 март куни соат 23:30 да пойтахт аэропортида бўлиб ўтган. Олмаота—Тошкент авиарейси билан келган Ўзбекистон фуқароси самолётда сумкасини унутиб қолдирганини айтган. Сумкада 1,8 минг доллар 300 минг сўм, банк картаси, қулоқчинлар ва телефон қувватлагичи бўлган.
Терговга қадар текширув ишлари натижасида аниқланишича, самолётларни тозалаш билан шуғулланувчи хусусий клининг компанияси ходимаси мазкур сумкани топиб олиб, уни ўзлаштиргани аниқланган.
Аёлдан пул ва буюмлар ашёвий далил сифатида гувоҳлар иштирокида расмийлаштирилиб олинган. Мазкур ҳолат юзасидан терговга қадар текширув ишлари олиб борилмоқда.
Изоҳ (0)