Ўзбекистонда 2021 йилдаги президент қарорига мувофиқ, чекка ҳудудлардаги бюджет ташкилотларида бошқа жойлардан келиб ишлаётган олий маълумотли мутахассислар моддий рағбатлантирилмоқда. Хусусан, бир вилоятдан бошқасига бориб дарс берадиган ўқитувчиларнинг базавий тариф ставкаларига 100 фоиз махсус устамалар тўланяпти. “Дарё” Бухоро вилоятидан Қашқадарё вилоятига бориб ишлаётган ва мазкур имтиёздан фойдаланаётган ўқитувчилар оиласининг ҳаёти, фаолияти ва мақсадлари ҳақида ҳикоя қилади.
Асли бухоролик бўлган Садилло Шарипов ва Замира Эшонқуловалар оиласи 2021 йилда Қашқадарё вилояти, Китоб туманидаги қишлоққа кўчиб борган. Улар ҳозиргача туманнинг чекка ва тоғли ҳудудлари — “Обиканда” ва “Туябоши” МФЙларидаги 64 ва 66-умумий ўрта таълим мактабларида математикадан дарс бериб келмоқда.
“Даромадимиз ойига 14-15 миллион сўм”
Садилло Шарипов ва Замира Эшонқулова Қашқадарёга келишдан аввал 30 йилдан ортиқ вақт давомида Бухородаги мактабларда фаолият юритган. Жумладан, Садилло Шарипов 33 йиллик, Замира Эшонқулова 35 йиллик иш стажига эга.
“Президентимизнинг олис ҳудудларга малакали мутахассисларни жалб қилишга доир қарори чиққан пайти оилам билан чекка қишлоқлардаги болаларга таълим беришга қарор қилдик ва шартнома асосида шу ерга келдик. 2021–2022 йилларда 64-мактабга раҳбарлик қилдим. Ўзим 17 йил давомида (2003-2020 йиллар) Бухоро туманидаги 37-мактабни бошқарганман. Туман марказидан анча олисда (20 км) бўлгани учун қишлоққа тараққиёт ҳам аста-секин кириб келмоқда. Бу ерда алоқа, электр энергияси, суюлтирилган газ таъминоти мавжуд. Мактабларда шароитлар яхши, қишда иситилади. Айниқса, ёзда бу ернинг табиати ажабтовур бўлади. Ишлаш ва дам олиш учун ҳам шароитлар ажойиб”, — дейди Садилло Шарипов.
Ўқитувчининг қўшимча қилишича, улар топаётган даромад кўпчилик ҳавас қиладиган миқдорда.
“Шу ердаги мактабда директор бўлиб ишлаган вақтимда ҳар ой аёлим иккаламиз 18 миллион сўмгача ойлик олганмиз. Ҳозир эса даромадимиз ойига 14-15 миллион сўм. “Обиканда” қишлоғидаги ҳовлида истиқомат қиламиз. Қишлоқда ижара нархи жуда арзон ва ҳамёнбоп”, — деди у.
“Дарё” мухбири билан суҳбатда Замира Эшонқулова ҳам таассуротларини баён қилди.
“Мен 66-мактабда математика фанидан дарс бераман. Мактаб собиқ совет даврида қурилган бўлса-да, таъмирланган, шароитлари қониқарли. Ишга келган йилимиз хўжайиним билан маслаҳатлашиб, Cobalt автомобилини харид қилгандик. Бугунги кунда маошимиздан машина пулини ҳам тўлаб бормоқдамиз” — деди мутахассис.
“Масала пул билан боғлиқ”
Садилло Шарипов бундай чекка қишлоққа келиш сабаблари ҳақида гапираркан, масала иқтисодий томонга бориб тақалишини айтди.
“Бу ерга келишимиздан олдин Бухоро туманидаги мактабда ўқитувчилар сони ортган ва дарс соатлари камайиб кетганди. Бундай ҳолатда одам бор кучи билан ишлай олмайди. Айрим ўқитувчилар қўшимча даромад излашга тушади. Машина олиб, кира қиладиганлар ҳам бор. Ёзги дам олиш вақтлари устачилик билан шуғулланадиганларини ҳам учратасиз. Шундай вазиятда “Обиканда”га оилам билан келиб, ишлаш таклифи менга жуда маъқул кўринди. Бу ерда ортиқча босимларсиз ишлаймиз, бор диққатимизни таълимга қаратамиз. Тоғ болалари содда, тўпори. Лекин жуда интилувчан бўлади. Ҳозирда 11-синфларни ҳам ўқитяпман. ОТМларга ўқишга кириш учун қаттиқ интилаётган шогирдларим бор, — дея таъкидлади Садилло Шарипов.
Ўқитувчилар оиласи ҳар чорак ва ёзги таътил пайтида Бухорога бориб, яқин қариндошлар ҳолидан хабар олиб келади. Ҳозирда оиланинг икки фарзанди ҳам педагогика соҳасидан кетиб, Бухоро туманидаги 37-мактабда фаолият юритмоқда.
Садилло Шарипов “Обиканда” қишлоғида интернет сифати яхшилиги ва ундан кўп фойдаланишларини айтди.
“Интернетнинг яхши ишлаши онлайн платформалар, жумладан, kundalik.com сайтидан фойдаланишда, ўз устимизда ишлашга шароит яратади. Қолаверса, интернет орқали фан ва таълим янгиликларини кузатиб борамиз. Оиламизнинг ҳоббиси – китоб мутолаа қилиш. Ўқитувчи қандай фандан дарс бермасин, бадиий адабиёт ва китоб унинг ҳамроҳи бўлиши керак. Бадиий адабиёт унинг тилини бурро қилади, ўқувчининг кўнглига кириб боришга ёрдам беради”, – дейди Садилло Шарипов.
Суҳбат давомида математиклар оиласи нафақага чиққунга қадар қишлоқдаги мактабларда дарс бериш ниятида эканини айтди.
Изоҳ (0)