Тошкентда 1 март куни Ўзбекистон—АҚШ музокаралари бошланди, деб хабар бермоқда “Дарё” мухбири.
Ташқи ишлар вазири вазифасини бажарувчи Бахтиёр Саидов ва бир кун аввал ташриф билан Ўзбекистонга келган АҚШ давлат котиби Энтони Блинкен музокаралар ўтказиш учун учрашди.
Музокаралар аввалида икки давлат ташқи идоралари раҳбарлари мамлакат байроқлари олдида суратга тушди.
Ташрифдан кўзланган асосий мақсад Ўзбекистон—АҚШ стратегик шериклигини янада ривожлантириш масалаларини муҳокама қилишдан иборат.
.jpg)
Бахтиёр Саидов АҚШ Давлат котиби Энтони Блинкен билан учрашув самарали бўлганини айтди.
"Бизнес алмашинувлари учун қулай шароитлар яратиш, Ўзбекистон кадрлар салоҳиятини ошириш, Марказий Осиёда минтақавий хавфсизликни мустаҳкамлаш ва бошқа қатор масалалар бўйича саъй-ҳаракатларимизни бирлаштиришга келишиб олдик. АҚШ ҳукумати томонидан Ўзбекистон президентининг ислоҳотлар дастурини мунтазам ва ҳар томонлама қўллаб-қувватланаётганини юксак қадрлаймиз", – деб ёзган вазир Telegram каналида.
Бу АҚШ давлат котибининг Ўзбекистонга биринчи ташрифи ҳисобланади. Ушбу ташрифдан аввал Блинкен Қозоғистоннинг Остона шаҳрида “C5+1” форматидаги (Марказий Осиёв + АҚШ) учрашувда иштирок этганди. Унда Ўзбекистон ташқи ишлар вазири вазифасини бажарувчи Бахтиёр Саидов ҳам қатнашди.
Ушбу йиғилишда АҚШ, Қозоғистон, Қирғизистон, Тожикистон, Туркманистон ва Ўзбекистон ўртасидаги иқтисодий, энергетика, атроф-муҳит ва хавфсизлик соҳасидаги ҳамкорликни мустаҳкамлаш масалалари муҳокама қилинди.
Изоҳ (0)