Хонанда Муниса Ризаева АҚШ сафаридан қайтган куниёқ Тошкентдаги Hilton меҳмонхонасида “Бобо” қўшиғига ишланган клип премерасини ўтказди. Хонанда “Дарё” жамоасига ҳам тилла тухумча ичидаги ноодатий таклифнома юборди. Кўплаб шоу-бизнес вакиллари ташриф буюриб, хонандани янги ижод маҳсули билан қутлашди.
Хонанда премеранинг дресс коди тилла рангда бўлиши ҳақида айтиб ўтганди. Шунга монанд меҳмонхонанинг махсус йўлаги ҳам тилла рангга бурканган. Тилла рангли улкан тухум эса барча меҳмонларнинг эътиборини тортди.
Фото: “Дарё”
— “Бобо” қўшиғи асли фолкор жанрга мансуб бўлиб, узоқ йиллик тарихга эга. Уни куйлаш таклифини беришганда, менга маъқул бўлди. Клип ғояси устида анча ишланди. Уни яратишда катта жамоа меҳнат қилди.
Қўшиқни ўзбек, рус ва тожик тилларида ижро этдик. Яқин орада Тожикистонга гострол сафарини уюштирмоқчимиз. “Бобо”нинг тожик тилидаги варианти ҳам ўша ердаги мухлислар учун ажойиб туҳфа бўлади, деб ҳисоблайман, — дейди хонанда.
Хонанда тақдимотда шунчаки клип намойишини ўтказмади. Премьерадан сўнг қўшиқни ижро этиб, бир гуруҳ рақс усталари билан бирга рақсга тушди.
Муниса Ризаева фақатгина шу совға билан кифоялангани йўқ. У тухум шаклидаги улкан торт билан барча меҳмонларни сийлади.
— Муниса Ризаева билан 12 йил аввал бир фильмда суратга тушганмиз. Ҳар доим оргиналликка интиладиган ижодкор. Дизайнер бўлганим учун аввал либосларига эътибор бераман. Ҳамиша ноодатийликка интилади, — дейди актриса Шаҳзода Муҳаммедова.
— Дугонамнинг ғайратига тан бериш керак. Қўшиқ ҳам худди у учун ёзилгандек бўлибди. Ёшларга маъқул келади. Клип эса оргинал, анча-мунча инсон меҳнат қилгани кўриниб турибди, — дейди комик актриса Шаҳло Зоирова.
Ёрқинхўжа Умаровнинг тахминига кўра, клип учун 20 000 АҚШ доллари миқдорида маблағ сарфланган. Чунки клипда малакали графика усталари меҳнатидан кенг фойдаланилган.
Юлдузли тақдимот қандай ўтганини билишни истасангиз, “Дарё”нинг YouTube’даги каналига кириб, махсус репортажни томоша қилишингиз мумкин.
Изоҳ (0)