Мутахассис уй шароитида тайёрланган консервалар ҳаёт учун хавфли эканини айтди

Санитария-эпидемиология қўмитаси бошқарма бошлиғи Анвар Шукуров уй шароитида тайёрланган қўлбола консервалар ҳаёт учун хавфли эканини айтди.

Унинг таъкидлашича, аксарият хонадон бекалари ёз ва куз фаслларида мева-сабзавотлардан консервалар тайёрлаб, қишга ғамлаб қўяди. Бироқ уй шароитида етарли босимда термик ишлов бериш имконияти мавжуд эмаслиги натижасида ботулизм қўзғатувчи споралар сақланиб қолади ва улар анаэроб, яъни кислородсиз муҳитда ривожланиб, ўта кучли — ботулинотоксин заҳрини ҳосил қилади.

Ботулизм қўзғатувчилари ташқи муҳитга ўта чидамли бўлиб, 100 даражада 6 соат, 120 даражада эса 10 дақиқагача тирик бўлади. Ўзида бундай зарарли моддани сақловчи консерва маҳсулотларини истеъмол қилиш натижасида турли салбий оқибатлар, ҳаттоки ўз вақтида тиббий ёрдам кўрсатилмаганда ўлимга олиб келувчи энг оғир турдаги заҳарланиш — ботулизм касаллиги келиб чиқади.

Хасталикнинг яширин даври 2-4 соатдан 14 кунгача давом этиши мумкин. Ботулизм микробининг токсини асосан марказий асаб тизимига таъсир этади ва организмда турли ўзгаришларга олиб келади. Бу ҳолатда кўпинча нафас олиш қийинлашиши, оғиз-томоқнинг қуриши, жисмлар кўзга иккита бўлиб кўриниши, кўз қовоқлари осилиб қолиши, ютиниш қийинлашиши ҳамда умумий ҳолсизланиш, кўнгил айниши ва қусиш (кўпинча такрорланади), қорин соҳасидаги оғриқ каби белгилар намоён бўлади. Беморнинг сўзлари тушунарсиз бўлиб қолади, бўйин ва оёқ мушакларининг заифлашиши натижасида юришга қийналади. 

Шу сабабли ботулизмнинг олдини олишда қуйидагиларга амал қилиш лозим:

• уй шароитида консерваларни тайёрламаслик;
• бозор ва аҳоли гавжум жойларда фуқаролар томонидан сотилаётган, номаълум шароитда тайёрланган, сифати кафолатланмаган консерваларни харид қилмаслик;
• банка қопқоғи кўтарилган (бомбаж), шунингдек, рангида ўзгариш бўлган консерваларни истеъмол қилмаслик;
• озиқ-овқат маҳсулотларини сақлаш шароитларига эътибор бериш, савдо дўконларидан консерваларни харид қилишда унинг муддати, идишларнинг бутунлиги, қопқоқлари шишмаганлиги ва хавфсизлигини кафолатловчи ҳужжатларига эътибор бериш;
• таом тайёрлашда тозаликка ва шахсий гигиена қоидаларига тўлиқ риоя этиш.