“Тутли” фотоэлектр станцияси бир йилда 140 мингта хонадонни электр билан таъминлаши маълум қилинди

Самарқанд давлат университети кафедра мудири Субҳон Аҳроров қуёш электр станциялари электр энергия муаммолари ечими эканини айтди.

Таъкидланишича, Ўзбекистонда ҳам энергетика соҳасига стратегик йўналиш сифатида эътибор қаратилиб, охирги йилларда янги энергия қувватлари қурилган. Шунга қарамай аҳолининг ортиб бориши, саноат корхоналарининг кўпайиши электр энергиясига бўлган талабнинг ҳам йилдан йилга ошишига олиб келмоқда. Мамлакатда 2030 йилга келиб электр энергиясига бўлган талаб жорий 74 миллиард кВт/соат дан 110 миллиард кВт/соатгача ошиши ҳисоб-китоб қилинган.

Шу туфайли қуёш энергиясидан фойдаланиш борасида амалий ишлар қилинмоқда. Масалан, француз компанияси Тотал Эрен тўлиқ ишлаб чиққан “Тутли” фотоэлектр станцияси 2022 йилда Ўзбекистонда қурилган йирик қуёш электр станциялардан бири ҳисобланади. Унинг қуввати 131 мВт. У бир йилда 270000 кВт/соат электр энергия ишлаб чиқиб, 140000 та хонадонни электр энергия билан таъминлайди.

Қайд этилишича, бундай қуёш электр станцияларининг кўплаб барпо этилиши, ўзбек қуёш энергетикасининг сифат жиҳатдан янги босқичга кўтарилишига олиб келади.

“Агар йирик ташкилотлар, корхоналар ҳам қайта тикланувчи энергия манбаларидан оммавий фойдаланишга ўтса, табиий бойликлар захиралари сақлаб қолинади ва табиатга етказилаётган зарар миқдори сезиларли даражада камаяди. Шу билан биргаликда, қайта тикланувчан энергия манбаларидан бири бўлган қуёш нурини бевосита электр энергиясига айлантириб берадиган фотоэлектр станцияларидан фойдаланиш атроф-муҳитга зарар етказмай, иқтисодиётни ривожлантиришга катта ҳисса қўшади”, — дейилади хабарда.