Олий Мажлис Қонунчилик палатасининг Меҳнат ва ижтимоий масалалар қўмитаси раиси Мавлуда Хўжаева Тошкентда ногиронлиги кўриниб турган беморларни сарсон қилмай уларни ногиронлик гуруҳларига чиқариш амалиёти жорий қилинганини айтмоқда. Бу ҳақда у Тошкент шаҳрининг Яшнобод туманида жойлашган “Ишга марҳамат” моно-марказида бўлиб ўтган давра суҳбатида маълум қилди.
Кеча, 2023 йилнинг 10 февраль куни Тошкент шаҳрининг Яшнобод туманида жойлашган “Ишга марҳамат” мономарказида Олий Мажлис Қонунчилик палатаси депутатлари, Камбағалликни қисқартириш ва бандлик вазирлиги, шунингдек вазирлик ҳузуридаги ташкилотлар фаоллари, жамоатчилик вакиллари билан давра суҳюати бўлиб ўтди.
Семинарда депутатлар ва вазирлик масъуллари аҳолини ижтимоий ҳимоя қилиш тизимини такомиллаштириш мақсадида амалга оширилаётган ишлар ҳақида гапирди.
“Бугун айнан Тошкент шаҳрида ногиронлиги кўриниб турган беморларни оворагарчиликсиз, уйида ётган ҳолатида ҳам электрон ҳужжатлар ёрдамида ногиронлик гуруҳига чиқариш амалиёти йўлга қўйилган. Бунинг барча ҳуқуқий асослари яратилган. Фақат ишлаш механизимидаги камчиликларини бирин-кетин бартараф этишимиз лозим бўлади”, — деди Олий Мажлис Қонунчилик палатасининг Меҳнат ва ижтимоий масалалар қўмитаси раиси Мавлуда Хўжаева.
Таъкидланишича, Ўзбекистонда аҳолини ижтимоий ҳимоя қилиш стратегиясида кам таъминланган оилаларни ижтимоий ёрдам дастури билан қамраб олиш даражаси 58,8 фоиздан 98,1 фоизга етказиш, камбағаллик даражасини 17 фоиздан 5 фоизга қисқартириш, аҳолининг меҳнат бозорида кўрсатиладиган хизматлар билан қамраб олинганлигини 64,2 фоиздан 70 фоизга ошириш, ишсизлик нафақасини олувчи ишсизлар улуши 5,7 фоиздан 7 фоизга ошириш каби ижтимоий ҳимоя соҳасига таалуқли 10 та мақсадли кўрсаткичлари белгиланган.
“Мазкур мақсадларни ҳаётга тадбиқ этиш борасида 2022 йилда ҳам кўплаб муҳим устувор вазифалар амалга оширилди. Камбағаллик даражаси 2022 йилдаги 17 фоиздан 2023 йил 1 январь ҳолатига кўра, 14,1 фоизга тушишига эришилганлиги ушбу вазифаларнинг ёрқин мисолидир. 2022 йилда ъИжтимоий ҳимоя ягона реестръига 2,3 миллион оила киритилган бўлиб, 2,2 миллион кам таъминланган оилаларга болалар нафақаси ҳамда 74,8 минг кам таъминланган оилаларга моддий ёрдамлар сифатида жами 11,4 триллион сўм маблағлар тўлаб берилган” — дейди давра суҳбатида сўз олган масъуллар.
Қўшимча қилинишича, 2022 йилда фуқароларни касб-ҳунарга ўқитиш кўламини кенгайтириш мақсадида “Ишга марҳамат” мономарказлари сони 23 тага, маҳалла касб-ҳунарга ўқитиш масканлари сони 489 тага етказилган. Мазкур таълим муассасаларида 140 минг ишсизлар касб-ҳунарга ўқитилган. Имконияти чекланган шахсларни бандлигини таъминлаш мақсадида алоҳида Миллий дастур ишлаб чиқилиб, 15 минг ногиронлиги бўлган фуқароларнинг бандлигига кўмаклашилган.