8 февралдан Тошкентнинг Яккасарой туманида жойлашган Тўқимачилик институти технопаркида Туркиядаги зилзиладан жабр кўрганлар учун моддий ёрдам акцияси бошланди.
Ўзбекистонликлар технопаркка турли ўлчам ва ҳажмдаги кийимлар, озиқ-овқат маҳсулотлари, болалар тагликлари, гигиеник воситалар, маиший техникалар, иситиш мосламалари, кўрпа-тўшак, чодир каби зарур маҳсулотларни олиб келмоқда.
“Дарё” куннинг қайси вақти бўлишига қарамай давом этаётган жараёнлардан репортаж тайёрлади.
Хайрия ишларига бош-қош бўлаётган фаоллардан бири тадбиркор Халдун Жан Шекержи ўзбек халқининг меҳрибонлиги ва ҳамдардлиги учун миннатдор.
— 20 йилдан бери Ўзбекистонда яшайман. Бу ердаги ўзбек ва турк халқи Туркиядаги фалокатдан қийналганларга ҳамжиҳатликда ёрдам беришяпти. Ўзбек қардошларимиздан жуда хурсандмиз, мана икки кунки, тинмасдан уйларидаги буюмлари, кийим-кечаклари, ҳаттоки кичкинтой болалар ўзлари йиғган пулларини олиб келишяпти. Худо хоҳласа, бугун биринчи самолёт жўнайди, рейсни бепул қилиб бергани учун “Ўзбекистон ҳаво йўллари”га ҳам катта раҳмат. Ундан аввалроқ ҳурматли президентнинг кўрсатмаси билан ФВВдан 100 та техник машина юборилди. Бу ерда сўзлар билан айтиладиган нарса жуда кам, фақат кўриш, гувоҳ бўлиш керак. Ўзбек халқи турклар дардини чин қалбдан ҳис қиляпти, масжидларда дуо қилишяпти, моддий, молиявий ёрдам беришяпти. Душманимизга ҳам бундай фалокатни раво кўрмаймиз, юртимиз тинч бўлсин, — дейди у.
Изоҳ (0)