Эски тиш чўткангизни ташлаб юборманг, у сизга кўп ишда қўл келади
Тиш чўткалар ўрнини босадиган буюм топиш мушкул. Чўтканинг ўзи ўнлаб ёрдамчи асбоб-ускуналар вазифасини бажара олади, баъзан самарадорлик бўйича улардан ошиб ҳам кетади. Қуйидаги тиш чўткалари қўшимча вазифалари сизни ҳайратда қолдириши аниқ.
Ошхона печкаси
Конфорка ва газ плиталарни тозалаш учун эски тиш чўткасидан фойдаланинг. Унинг кичик ўлчами ва эластиклиги туфайли мато ёки шимгич етиб бормаган жойлардаги чиркларни осонгина тозалайди.
Кафель оралиқлари
Тиш чўткаси ҳаммом ва ҳожатхонадаги кафель орасида йиғилган оҳаксимон қаттиқ кирларни кетказишга ёрдам беради. Чўткани оқартирувчи эритмага ботириб артиб олинг. Тозалашдан кейин кафелларни тоза сув билан ювинг.
Бўр ва рангли қалам излари
Деворларда ёш рассомлар ишининг изларини топсангиз, уларни тиш чўткаси билан олиб ташлашга ҳаракат қилинг. Унга озгина миқдорда соқол олиш кўпикдан ёки тиш пастасидан қўллаб, аста-секин думалоқ ҳаракатлар билан сиртга суртинг. Сўнг қоғоз салфетка билан изларни ўчириб чиқинг.
Компьютер клавиатураси
Клавиатура тугмалари орасида кўпгина чанг тўпланади. Уни оддий мато ёки салфетка билан тозалаб олиш жуда қийин. Қаттиқ, қуруқ чўткадан фойдаланинг. Клавиатурани ён томонига буринг ва клавиатурадаги қолдиқларни эҳтиёткорлик билан тозаланг.
Қирғич
Тажрибали уй бекалари ушбу ошхона буюмини қолдиқларидан, айниқса, қуритилганидан сўнг тозалаш қанчалик қийинлигини билишади. Қирғични тиш чўткаси билан тозалаш мумкин.
Маккажўхори
Маккажўхори бошоқларини пиширишни режалаштиряпсиз, лекин уларнинг “сочларини” ололмаяпсиз. Бу пайтда тиш чўткасини ёрдамга чақиринг. Жараён анча кам вақт талаб этади, натижа сизни қувонтириши аниқ.
Сочни бўяш
Уйда сочингизни бўясангиз, чўткангизни тиш чўткасига алмаштириб кўринг. Уни ишлатиш анча қулай, айниқса, соч қисқа бўлса ундан-да қулай. Тиш чўткаси мукаммал ўлчамга эга, бу эса бўёқни ҳатто, етиш қийин бўлган жойларда ҳам аниқ қўллаш имконини беради.
Қайсар сочлар
Ёмғир пайтида сочларингиз жингалак бўлиб қолса ва тартибсиз кўринса, бўйсунмаган сочни лакка ботирилган тиш чўткаси билан таранг.
Сабзавотларни тозалаш
Юпқа қатламли қўзиқорин ва сабзавотлардан тупроқ қолдиқларини олиб ташлаш учун юмшоқ тиш чўткасидан фойдаланинг. Картошка учун эса, аксинча, қаттиқ чўтка керак бўлади. Бундай қайта ишлаш маҳсулотларнинг сақлаш муддатини узайтиради: қуруқ ва тоза сабзавотлар анча узоқроқ сақланади.
Ошхона раковинаси
Чирк ёпишиб қолган ошхона раковинасини тозалаш учун тиш чўткаси қулай воситадир. Аксессуарнинг тукли қисми ёнида жойлашган тутқич қисмини шам ёки зажигалка оловида 3-5 сония ушлаб туринг. Кейин пластмассани 90 даража секин эгиб олинг. Энди чўткадан фойдаланиш анча янада қулай бўлади.
Соч қуритгич
Соч қуритгичнинг очиқ қисмларини тиш чўткаси ёрдамида чангдан тозаланг. Иситиш қисмига тушган чанг соч ускунасининг шикастланишига олиб келади. Унинг узоқ хизмат қилиши учун ҳар 1-2 ҳафтада бир марта бундай тозалашни амалга оширинг.
Вентиляция
Тиш чўткаси ёрдамида ҳаммомдаги шамоллатиш панжараларини ва автомобилдаги ҳаво тўсиқларини тез ва самарали тозаланг. Чанг ва чирк тўпланишига мойил бўлган бу жойлар замбуруғ ва бактериялар учун ажойиб муҳитдир.
Ҳимоя панжарасини олиб ташланг ва кўринадиган қисмларни қуруқ чўтка билан тозаланг, кейин уларни нам мато билан артиб олинг.
Мавзуга доир:
- Кир ювиш кондисионеридан фойдаланишнинг 9 та кутилмаган усули
- Микротўлқинли печни ялтиратиб тозалашнинг синалган усуллари
- Кир ювиш машинасини қандай тозалаш керак?
