Андижонда ҳокимлик таклифи билан мактаб ҳовлисида қўшимча бино қуриб, ёшларни ишли қилишга уринган тадбиркорнинг ноқонуний қурилиши бузиб ташланиши мумкин

Андижон вилоятининг Балиқчи туманида яшовчи тадбиркор Хайрулло Тожиқулов “Дарё”га мурожаат қилиб, 2020 йил туман ҳокимлиги томонидан берилган ҳудуддаги 25-умумтаълим мактабининг 4 сотих ерига қўшимча бино қурганини, бино фойдаланишга топширилганидан икки йил ўтиб, ноқонуний деб топилаётганини, қурилишга сарфлаган маблағига куйиб қолиши мумкинлигини айтмоқда. “Дарё” мухбири мурожаатини ўрганиш мақсадида Балиқчи туманида бўлди.

Аниқланишича, вилоят Халқ таълими бошқармаси тадбиркор мактаб ҳовлисида қурган бинони буздиришни сўраб, судга даъво ариза ҳам киритган.

Тадбиркор Хайрулло Тожиқуловнинг айтишича, ушбу ер унга тадбиркорликни ривожлантириш мақсадида, кейинчалик ҳоким қарорини чиқартириб бериш шарти билан берилган.

“2020 йили туман ҳокими томонидан бизга ишсизларни ишли қилиш, тадбиркорликни ривожлантириш мақсадида 25-мактабдан 0,4 сотих жой берилган. Бу ерга bookcafe, кичик ўқув маркази, канстовар, сартарошхона қурганмиз. Ўшанда туман ҳокими икки ойда қарор чиқариб бераман деганди. Шу сабаб қурилишни бошлаганман. Лекин ҳалигача менга қарор берилгани йўқ. Бу жойдаги қурилишимни битказдим. Қисқа муддат ичида иш ўрни яратиб қўйдим. Ҳозирда сартарошхонанинг ўзида уч нафар, савдо дўконимизда эса қўшимча уч нафар ишчи ишлаяпти”, — дейди тадбиркор.

Тадбиркорнинг қайд этишича, собиқ Халқ таълими вазирлиги ҳозирда Мактабгача ва мактаб таълими вазири ўринбосари сифатида фаолият юритиб келаётган Темурбек Комилов мактаб ҳовлисидаги бино қурилишига рози бўлган. Вазирликнинг бўлим бошлиғи Иззатило Набиев эса тадбиркордан мактаб учун 80 миллион сўмлик моддий ёрдам беришини талаб қилган. Бу бўйича уч томонлама келишув ҳам имзоланган.

“2021 йилнинг август ойида собиқ Халқ таълими вазирлигидаги Темурбек Қаландарович келиб, жойни кўрди. Кейин “мактаб ўқувчилари боп жой экан. Биз розимиз, шу қарорни ҳал қилиб, уч кунда чиқариб берамиз”, деди. 2022 йилнинг февраль ойида эса Халқ таълими вазирлигининг халқ таълими муассасалари мулкидан самарали фойдаланишни мувофиқлаштириш бўлими бошлиғи Иззатилло Набиев деган инсон келди. У келиб “Сиз мактаб ҳудудида жойлашиб олибсиз. Майли энди жойлашганиз яхши. Энди бизга 80 миллион сўмлик моддий ёрдам берасиз”, деди. Қандай ёрдам деганимда мактабнинг кириш қисмларини асфалт қилиш ва қанақадир ёрдам керак бўлса, қилиб беришимни айтди. “Шуларнинг эвазига Сизга рухсат олиб берамиз” деб мен билан битим тузди. Битимга иложсиз рози бўлдим. Чунки бу ерга анчагина чиқим қилиб қўйгандим. Бу бўйича ёзма равишда, мактаб директори билан биргаликда келишув тузилган. Ҳозирга келиб, ўзлари қонуний қилиб берамиз деганлар, энди ноқонуний равишда кириб олибсан деяпти. Ваҳоланки, бу ерни қуришдан олдин кадастр раҳбари Бобур акани олиб келганман. Ўзи ўлчаб, ўзи бўлиб берган. Халқ таълими мудири Назокат Мақсудовнанинг ҳам розилик хати бор. Мана қўлимдаги ҳужжатлар тасдиғи. Туман ҳокимининг ҳам бу нарсадан хабари бор”, — дейди тадбиркор.

Тадбиркор қуришларнинг умумий қиймати 1 миллиард сўмга баҳоланганини, айни кунга қадар қурилишларга ўз маблағидан 500 миллион сўм миқдорида пул сарф қилганини айтмоқда.

“Бу ерга ўз маблағимдан сарфлаганман. Лойиҳа 1 миллиард сўмга баҳоланган. 500 миллион сўмини ҳокимият кредит тарзида олиб берилишини айтганди. Ярмини эса ўз ёнимдан сарфлайдиган бўлганман. Қўлимдан келганича қилдим. Лекин ҳалигача кредит ажратиб берилгани йўқ. Агар муамоллар ҳал бўлиб, бино тўлиқ бица нафақат мактаб ўқувчилари, балки ҳудуддаги ёшлар учун ҳам анча фойдали бўлишига ишонаман. Аммо ҳозир бу қурилишни битирадиган маблағим йўқ. Раҳбарлар қуриб, битказаверинг дегани учун қурганман. Агарда булар аввалроқ ўша пайтда, яъни 2020 йилда бу ноқонуний дейишганида мен қурмасдим. Шунча муаммоларга учрамасдим. Аввалига ишонтирганлар бир айланиб, ўзбошимчалик билан кириб олгансиз деган гаплар билан мени судга беришяпти. Буни битказаман деб уйдаги мол-қўйим ҳам қолмади, миниб юрган машинамни ҳам сотдим. Шуни битирсам, кредит олиб ўрнини қоплаб оламан, деб ўйлаганман. Гапирсам гап кўп”, — дейди у.

Тадбиркор ҳокимлик қарор чиқариб бермаса ҳам бинони буздирмасдан давлат-шерикчилик ёки ерни ижарага бериш асосида ҳам ишлашга тайёрлигини айтмоқда.

“Бир нарсани тушунмаяпман, буни буздиришдан кимга фойда? Хусусий мулк қилиб бермоқчи бўлмаса давлат-хусусий шерикчилик асосида ишлашга рухсат беришсин. Қандайдир йўллари бор-ку, ахир. Агар бинони битказиб, лойиҳаларни тўлиқ амалга оширадиган бўлсам қишлоғимиздаги ўқувчилар 50-100 минг сўм йўл кира сарфламасдан шу ерда ўқишга тайёргарлик кўришади, қизларимиз чеварчиликни ўрганишади, болалар сартарошлик ҳунарини эгаллаши мумкин. Умрини беҳуда ўтказмайди”, — дейди Хайрулло Тожиқулов.

Балиқчи тумани ҳокимининг инвестициялар ва ташқи савдо масалалари бўйича ўринбосари Сайдулло Абдулҳамидовнинг айтишича, вазирлик томонидан давлат-хусусий шерикчилик асосида фойдаланиш бўйича розилик хати берилган. Мулозим ушбу бино бузилмаслиги бўйича кафолат беришини айтган.

“Ўша пайтда ҳокимликда бош мутахассис вазифасида ишлаганман. Шу сабабли 25-мактабдаги ҳолатдан хабардорман. Тожиқулов Хайрулло акага бу ҳудуд қизининг номига ёшлар, хотин-қизларнинг бандлигини таъминлаш мақсадида берилган, ниятимиз яхши бўлган. Тадбиркор томонидан қурилиш ишлари олиб борилган, ҳақиқатдан пул сарфланган. Бугунги кунда тадбиркорга ёрдам берилиб, имтиёзли кредит ажратиш режалаштирилган. Тадбиркор яқин орада бу ерда 15 та иш ўрни яратилишини кафолатламоқда. Ҳудудда тикувчилик цехи, умумий овқатланиш шахобчаси ташкил қилиш бўйича амалий ишлар олиб борилган. Биз томонимиздан тадбиркор томонидан қурилган бино-иншоотларни хусусийлаштириш бўйича 2021 йил 1 майда ҳукумат комиссияси раиси Сардор Умрзоқовнинг ташриф протоколи баённномасига киритилган.

Ушбу баённомада собиқ Халқ таълими вазирлигига топшириқ юборилган. Собиқ вазирлик мутасадди ташкилот вакилларидан иборат ишчи гуруҳ билан ҳолатни ўрганган. Ўшанда тадбиркор билан келишув имзоланиб, вазирликка тақдим этилган. Вазирликдан дастлаб, давлат-хусусий шерикчилик асосида фойдаланиш бўйича розилик хати берилган, хусусийлаштириш бўйича берилмаган. 2022 йилнинг 18 ноябрида Президент администрацияси раҳбари топшириғига асосан мактаб ерларидан ноқонуний фойдаланиш ҳолатлари бўйича хатлов ўтказилган. Шуларни инобатга олиб қурилиш якунига етгани сабабли вазирликка яна мурожаат қилдик. Мурожаатимизни 15 иш кунида ўрганиб, ҳудудга масъулларни жўнатиб, тегишли хулосалар тақдим қилиши бўйича кўрсатмалар берилди. Ушбу жараёнда шахсан ўзим қатнашиб, ҳал этаман”, — дейди Сайдулло Абдулҳамидов.

“Дарё” мухбири Мактабгача ва мактаб таълими вазирлиги масъуллари билан боғланишга ҳаракат қилди, аммо бунинг имкони бўлмади.

“Дарё” воқеалар ривожини кузатишда давом этади.