Тошкент шаҳрида бола ўғрилари пайдо бўлгани ҳақидаги хабар ижтимоий тармоқларда тарқалиб, шов-шувларга сабаб бўлди. Пойтахт Ички ишлар бош бошқармаси бу маълумотни рад этиб, воқеа тафсилотларини келтириб ўтганди.
Кейинчалик бошқарма ахборот хизмати ҳодиса иштирокчилари — Шайхонтоҳур туманидаги 113-сонли мактабнинг 4 нафар 11-синф ўқувчисидан интервью олди. Маълум бўлишича, Ф.Н. бошқарувидаги Gentraъга Г.Б. ва С.Н. ердаги муз бўлагини тепган. Шундан сўнг йигитлар муз бўлагини тепган болаларни “ички ишларга олиб борамиз” деб уларни оғзаки қўрқитган. Болалар бошқа бундай қилмаслигини айтиб, уйига кетган.
“Бу видеони кўргандан кейин мен ҳам ҳамма ўйлаган нарсани ўйладим. Бундан барча ота-онанинг қони қайнайди. Кейин маҳалла нозирига чиқиб, воқеа иштирокчиларини топишни илтимос қилдим. Ўша куннинг ўзидаёқ ҳаммасини топишди. Аслида ўғлим ва унинг синфдоши мактабдан қайтаётганда қор тепиб келишаётган экан. Шу пайтда болаларнинг машинасига қор сачраган. Машинадагилар ҳам ҳали ёш бола экан. Тўхтаб болаларни машинагача судрагани уларнинг хатоси бўлган”, — дейди машинага муз тепган боланинг отаси.
“Мен 1-сменада ўқийман. 12:15 да дарсим тугагач, болалар билан кўчага чиқдик. Ўртоғим акасидан машина олган экан. Биз машинага ўтириб, озгина айландик. Соат 17:00 га яқин мен рулга ўтиришни сўрадим. Кейин унчалик кўп масофа юрмасдан олдимизда икки нафар ёш бола ўтди ва муз бўлагини тепди. Болаларга бошқа бундай қилмаслигини уқтириш учун озгина қўрқитиб қўймоқчи бўлдик. Шундан сўнг уйига жўнатдик, ўзимиз ҳам кетдик. Бу ерда мақсад бола ўғрилаш эмасди”, — дейди 11-синф ўқувчиларидан бири.
“Аҳолимиз ҳам бу норасмий хабарларни тарқатаётганларга ишонмаслиги керак. Чунки агар бу ҳақиқатан шундай бўлса, расмий манбаларда эълон қилинган бўларди. Бу нотўғри хабарлар. Шу сабабли бундай хабарларга ишонмасликни сўраб қолардим”, — дейди маҳалла раиси.
Маълум бўлишича, 11-синф ўқувчилари бошқарувида Gentra бир кунга ижарага олинган. Уларга машинани ҳайдовчилик гувоҳномаси бор йигит олиб берган. Унинг номига машина расмийлаштирилгач, автомобилни мактаб ўқувчиларига берган. Шундан сўнг йигит ўз уйига кетган. У қилган ишидан афсусда эканини билдирган.
Шайхонтоҳур тумани ички ишлар органи фаолиятини мувофиқлаштириш бўлими катта инспектори Мурод Қудратовнинг таъкидлашича, воқеа иштирокчиларининг ота-оналари билан суҳбат ўтказилган ва Маъмурий жавобгарлик тўғрисидаги кодекснинг 47-моддаси (Болаларни тарбиялаш ва уларга таълим бериш борасидаги мажбуриятларни бажармаслик) асосида баённома расмийлаштирилган.
Изоҳ (0)