Диққатни жамлашга ёрдам берувчи учта оддий усул

Тадқиқотлар шуни кўрсатадики, йил ўтган сайин диққат-эътиборимиз пасайиб боради. Бу ҳам касбий, ҳам шахсий ҳаётга таъсир қилади. Яхшики, муаммони вақтида аниқлаш ва уни бир неча оддий қадамлар билан ҳал қилишнинг имкони бор.

Диққатни жамлаш билан боғлиқ муаммоларни қандай аниқлаш мумкин?

Концентрация даражасини аниқлаш қийин эмас. Мавзуга оид тестларнинг бир нечтасини зудлик билан инглиз ёки рус тилларида интернетдан топа оласиз. Шунингдек, Шулте жадвалларидан ҳам фойдаланишингиз мумкин. Бу каби жадваллар, одатда, тез ўқиш кўникмаларини ривожлантириш, ҳисоблаш ва хотирани яхшилаш учун ишлатилади, аммо улар диққатни жамлашда ҳам яхши самара беради.

Қуйидаги аломатлар диққатни жамлай олмаслик билан боғлиқ муаммоларни кўрсатиши мумкин:

• нималарнидир тез унутасиз;
• бирон вазифани бажаришда эътиборингизни узоқ вақт давомида шу ишга қаратиб туролмайсиз;
• гоҳ гоҳида “миям қабул қилмай қолди” сингари ҳиссиётни бошдан кечирасиз;
• суҳбатдошингизнинг нутқини тинглаганингизда кўп чалғийсиз.

Диққатни жамлашни яхшилашнинг йўллари борми?

Афсуски, бунинг тезкор йўли йўқ. Аммо мунтазам амалиётлар ёрдам берадиган бир нечта техникалар мавжуд.

Зеҳни ривожлантириш машқларини бажаринг

Агар илгари буни бажариб кўрмаган бўлсангиз, “5-4-3-2-1” машқлари каби асосий машқлардан бошланг. Рақамлар қуйидагиларни англатади:

5 – Ёнингизда кўрган бешта нарсага диққат қилинг;

4 – Ушлаб кўришингиз мумкин бўлган тўртта нарсани танланг;

3 – Сиз эшитган учта товушга эътибор қаратинг;

2 – Атрофингизда иккита ҳидни ҳис қилинг;

1 – Татиб кўришингиз мумкин бўлган битта нарсани топинг.

Атрофингиздаги вазиятни тез-тез идрок қилишга одатланинг, иш ёки уйингиздаги муҳитни ўрганишга вақт топинг. Шу каби кичик машғулотлар диққатингизни оширишга хизмат қилади.

Фаол тингловчи бўлинг

Бу суҳбатдошингизнинг гапларини эшитиш учун онгли равишда ҳаракат қилишдан кўпроқ нарсани англатади. Чунки қабул қилинган маълумотни “фикран қайта ишлаш” учун вақт ва ақлий куч сарфлаш муҳимдир. Ушбу ёндашув ҳам диққатни кучайтиришга ёрдам беради.

Танаффус қилинг

Бу ғалати эшитилиши табиий, аммо ақлий танаффуслар диққатни жамлашни яхшилайди. Ишга доир вазифалардан танаффус қилинг, офисдан чиқинг, ишхонангиз атрофида бироз сайр қилинг, ўзингиз учун кофе дамланг ёки 5-10 дақиқа тоза ҳаводан нафас олинг. Иш столингизга қайтганингизда, диққатингизни вазифаларга қаратиш осонроқ бўлади ва унумдорлигингиз сезиларли даражада ортади.

Бундан ташқари, ақлий танаффуслар диққатни жамлай олмаслик ҳолатини келтириб чиқармаслик учун ижтимоий тармоқлардаги саҳифаларимизни кўриб чиққанда, ишлаш ўрнига Тik Тоk’да ўтирганимизда рефлекс тарзида ўз-ўзидан пайдо бўлади.

Мавзуга доир:

• Нима учун эснаймиз ва бу саломатлик билан боғлиқ қандай муаммоларнинг аломати?
• Ижтимоий тармоқларсиз бир кун, чалғимасдан овқатланиш. Бир йилда ҳаётингизни ўзгартирадиган 9 та тавсия