Барча тоифадаги ўқитувчилар ойлиги беш йил ичида тўрт баравар оширилди — вазирлик

Ўзбекистонда 2017 йилдан бери барча тоифадаги ўқитувчиларнинг ойлик-маошлари тўрт баравар оширилган. Бу ҳақда Олий таълим, фан ва инновациялар вазирининг биринчи ўринбосари Комилжон Каримов “Дарё” нашрига берган интервьюсида маълум қилди.

Вазирлик расмийсининг айтишича, ҳозирда ОТМларда ишлаётган ўқитувчилар ўртача 10 миллион сўм атрофида ойлик олмоқда.

“Таълим сифатини ошириш ва коррупцияга қарши курашишда ўқитувчиларни моддий рағбатлантириш муҳим аҳамиятга эга. 2017 йил билан таққослайдиган бўлсак, ўтган беш йил ичида барча тоифадаги ўқитувчиларимизнинг ойлик-маошлари тўрт баравар оширилди. Бугунги кунда ОТМларда ўқитувчиларнинг ўртача ойликлари 10 миллион сўмдан анча ошган. Айнан профессор-ўқитувчилар ва раҳбар кадрлар тўғрисида гапирсак, уларнинг ойлиги ҳозир минг доллардан ҳам юқори. Бу албатта, ижобий ҳол. Чунки бу орқали тизимдаги юқори малакали кадрларни сақлаб қолиш ва жалб қилишга имконият яратилади. ҳаракат қилса, ойлиги албатта минг доллардан ошади. Бугун давлат ОТМларида илмий унвонга эга профессор-ўқитувчилар сони умумий ўқитувчиларнинг 37 фоизидан ортиқ”, — деди у.

Аввалроқ Комилжон Каримов ижтимоий ҳимояга муҳтож талабаларни қўллаб-қувватлашга бўлган эътибор ортганини айтганди.

“Биринчи ўринда ногиронлиги бўлган, чин етим талабалар, кам таъминланган оила фарзандлари учун олий таълим олишга имконият яратилмоқда. Мисол учун, ногиронлиги бўлган талабалар учун умумий квотадан икки фоиз ўринлар ажратилмоқда. ОТМларга киришда уларга алоҳида танлов амалга ошириляпти. Чин етимлар ҳам давлат ҳисобидан ўқитиляпти. Бу йил минг нафарга яқин чин етим талабалар ўқишга қабул қилинди ва улар тўлиқ давлат ҳисобидан ўқитилмоқда. Шу билан бирга, кам таъминланган хотин-қизлар учун ҳам икки мингта квота ажратилган. Шунингдек, беш йил стажга эга бўлган 500 нафар хотин-қизларга ҳам квоталар берилмоқда”, — деган вазир ўринбосари.