Бельгия Германия билан чегарадаги 40 йиллик ядро реакторини ёпди
Бельгия мамлакатнинг атом энергиясига қарамлигини камайтириш учун тўрт ой ичида иккинчи ядро реакторини ёпди, деб хабар бермоқда Deutsche Welle.
40 йиллик “Тиханге-2” реактори узоқ вақтдан бери қўшни Германияда баҳс-мунозараларга сабаб бўлиб келаётганди. Немис расмийлари бир неча йиллар давомида хавфсизлик муаммоларини кўтариб, заводнинг босим остидаги корпусларида ёриқлар топилганидан кейин уни ёпишни талаб қила бошлади. Бельгия бу борадаги шартларнинг ошиб боришига қарамай, мамлакатга атом энергияси етказиб беришни тўхтатиш режаларини ортга суриб келди.
Реактор Германия билан чегарадан 50 километр узоқликда жойлашган. Германия атроф-муҳит вазири Стеффи Лемке маҳаллий ОАВга шундай деди:
“Станциянинг ёпилиши икки мамлакатда хавфсизликнинг сезиларли даражада ошишини кафолатлайди. Бельгиянинг атом энергетикасини босқичма-босқич тўхтатиш бўйича узоқ муддатли саъй-ҳаракатлари доирасида ‘Тиханге-2’ реактори ярим тунгача эксплуатациядан тўлиқ чиқарилади”.
2003 йилдан бери Бельгия қонунлари ядровий энергиядан босқичма-босқич воз кечишни талаб қилмоқда. Бироқ Россиянинг Украинага қарши уруши Европа энергетика бозорларини парчалаб ташлагани ва нархларнинг кескин кўтарилишига олиб келгани учун ҳукумат атом энергиясидан воз кечишни ўн йилга кечиктирди. Ҳукмрон коалиция таркибига кирувчи Бельгия Яшиллар партияси эса ядро энергетикасини мамлакат энергия таъминотидан чиқариб ташлашнинг ҳар қандай тарзда кечикишига қарши.
