Андижонга маҳаллаларда ижтимоий ва ишлаб чиқариш инфратузилмасини яхшилаш учун 1,5 триллион сўмга яқин маблағ йўналтирилади
Айни вақтда президент Шавкат Мирзиёев Янги Андижон туманида вилоят фаоллари ва масъуллар иштирокида видеоселектор йиғилишини ўтказмоқда. Бу ҳақда “Дарё” мухбири хабар берди.
Давлат раҳбари камбағалликни қисқартириш ва аҳоли бандлигини таъминлаш бўйича масъулларга топшириқ берди.
Хусусан, икки ҳафтада Андижон вилоятини “ишсизликдан холи ҳудуд”га айлантириш бўйича секторлар кесимида “йўл хариталари” тасдиқлаш топшириғи берилди. 2023 йилда бандлиги таъминланадиган 470 минг аҳолини ҳар бир сектор кесимида тақсимланиб, ижроси назоратга олинади.
Бош вазир ўринбосари Жамшид Қўчқоров ҳамда Қишлоқ хўжалиги вазирлигига туман ҳокимлари ва сектор раҳбарлари билан бирга, 2023 йилда аҳолига ажратиладиган 10 минг гектарда 75 мингта доимий ва 200 мингта мавсумий иш ўринлари ташкил этиш топширилди.
Камбағалликни қисқартириш ва бандлик вазирлиги ҳамда Иқтисодиёт ва молия вазирлигига ҳокимлар ва банклар билан ишлаб, хизматлар соҳасида 135 мингта иш ўрни яратиш топшириғи берилди.
Шунингдек, Камбағалликни қисқартириш ва бандлик вазирлиги 2023 йилда 10 минг аҳолини касб-ҳунарга ўқитиш ва 1,5 минг нафарига меҳнат қуроллари учун субсидия ажратиш топширилди.
Бош вазир ўринбосари Жамшид Ходжаев ҳамда Инвестициялар, саноат ва савдо вазирлигига 2023 йилда вилоятда 800 миллион долларлик 235 та инвестиция лойиҳасини ишга тушириб, 40 минг янги иш ўрни ташкил қилиш топширилди.
Касаба уюшмалари федерация ҳамда Бош вазир ўринбосари Зулайҳо Маҳкамовага бир ой муддатда “маҳаллабай” ҳисоб-китоб қилиб, аёлларни касб-ҳунарга ўқитиши, уларни иш билан таъминлаши керакли бўйича топшириқ берди.
“Бунда, камида 12 минг нафар аёлнинг фарзанди янги боғчаларга боришини инобатга олиш, биринчи галда уларни ишлаши учун шароит қилиб бериш зарур. Бунинг учун, Иқтисодиёт ва молия вазирлиги ҳамда Мактабагача ва мактаб таълими вазирлиги 2023 йилда хусусий боғчаларни ривожлантириш учун, вилоятга қўшимча 50 миллиард сўм субсидия ажрацин”, — деди давлат раҳбари.
Ёшлар сиёсати ва спорт вазирлигига 2023 йилда меҳнат бозорига кириб келадиган 55 минг андижонлик ёшлар билан манзилли ишлаш топширилди. Шу билан бирга:
- “Ёшлар дафтари” орқали вилоятдаги 23 минг нафар ёшларга кўмаклашиши;
- 17 минг нафарига кредит бериб, уларни тадбиркор қилиши;
- 26 минг нафарига деҳқончилик учун ер ажратиши;
- 11 минг нафарини бўш иш ўринларига жойлаштириши зарур.
Маҳаллаларда ижтимоий ва ишлаб чиқариш инфратузилмасини яхшилаш учун, Андижонга жами 1,5 триллион сўмга яқин маблағ йўналтирилмоқда. Шунингдек, “Очиқ бюджет” доирасида маҳаллалар инфратузилмасига қўшимча 675 миллиард сўм ажратилади.
