“Менинг юртим” телеканалида 27 январь куни эфирга узатилган “Марказий студия” кўрсатувида халқаро журналист Навбаҳор Имoмова Ўзбекистон медиамуҳитидаги коррупция ҳақида гапирди.
Унинг таъкидлашича, ОАВда эълон қилинаётган пул эвазига тайёрланган айрим материаллар аудиторияга билдирилмайди. Аслида, ўқувчилар бу ҳақда огоҳлантирилиши керак. Айрим ҳолларда бу расман, ташкилотларга пул ўтказиш орқали ёки норасман, чўнтакка пул солиб қўйиш эвазига амалга оширилади.
“Медиада коррупциянинг яна бир шакли бу биз сизнинг PR билан ишлаймиз, яъни обрў-нуфузни ошириб берамиз, деб ҳам пул олишади. Рекламадан ёки PR’дан даромад қилиш айбли эмас. Бу нормал ҳолат. Мени журналист сифатида безовта қиладиган жиҳати, бу рекламанинг сир тутилаётганидир. Ёки муайян томонлар учун хизмат кўрсатиш шаклидир.
Одатда журналист, блогерлар айтишадики, бизга тирикчилик керак. Бирор-бир мурожаатни ёритадиган бўлсак, мурожаатчи томон бизга харажатларни қоплаши керак, дейишади. Тўғри, буни қайсидир даражада қабул қилиш мумкин, лекин аудиториядан яширилмаслиги керак.
Биринчидан, қачондир нормаларни белгилашни бошлаш керак. Ўзбекистонда мард ва жасоратли оммавий ахборот воситалари секин-секин майдонга чиқиши керак ва улар ҳозир ҳам бор. Бундай нашрлар жуда ҳам оз ҳамда бошқаларнинг босимига қарши курашиш билан банд. Улар ҳам реклама, тижорий контент ва ахборот учун чегаралар чизиб қўйиши керак.
Коррупция ҳеч бир пайт бир томоннинг иши бўлмайди. Оладиган ва берадиган томон бор. Журналистлар бу вазиятда иштирокчи бўлиб қолади. Сиз коррупцияда иштирокчи экансиз, демак, коррупцияни ёрита олмайсиз”, — дейди журналист.
Изоҳ (0)