“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 16-сони мавзуси “Ички ишларнинг ички ишлари” бўлиб, дастур меҳмони сифатида ИИВ матбуот котиби Шоҳрух Ғиёсов таклиф этилди.
Ички ишлар вазирлиги матбуот котиби эфир давомида бир обуначининг оммавий ахборот воситаларида сўз эркинлиги нега таъминланмаётгани ҳақидаги саволига жавоб берар экан, журналистлардан кўра баъзи блогерларнинг нохолислиги ҳақида ҳам тўхталиб ўтди.
— Ижтимоий тармоқларда ахборот тарқатувчилар бор. ОАВ журналистлари шу йўналишда ўқиган, уларда медиасаводхонлик юқори, нима маълумот беришни билади, сўраб-суриштиради, холис ёндашади. Лекин блогосферада муносабат сўрашмайди, чиққан маълумотни дарров қўйиб юборишади, кейин шу бўйича муносабат кутишади. Биз ҳаммасига ҳам муносабат бермаймиз, ҳодиса шов-шувга сабаб бўлса ёки резонанс келтириб чиқарса, ҳақиқатан тушунтириш керак бўлсагина, муносабат берилади. Лекин ҳар қандай ҳолатда реакция қилинади, ҳолат ўрганилади.
Матбуот котиблари ҳақида турли гаплар айтишади, масалан, Анора Содиқованинг шунақа одати бор, Ғиёсов ёлғон маълумот берди, дейди. Бунинг ҳаммаси нимадан келиб чиқади? Маълумот берилгандан кейин кўпчилик хабарнинг ичига кирмайди, бош қисмини кўради, изоҳларига киради. Биринчи тўртта изоҳ ижобий бўлса, ижобий фикр ёзади ёки индамайди. Агар комментлар салбий бўлса, ичидаги бор аламзадалиги акс этган фикрларини ёза бошлайди. Биз буни жуда яхши тушунамиз.
Шунинг учун ҳар доим блогерларга айтаман, сизлар аввал биздан сўранглар, маълумот берганимиздан кейин саҳифаларингга қўйинглар, деб. Шундай пайтлар бўлганки, блогер “Сиздан маълумот олсам, бунинг нима қизиғи қолади?” деган. Чунки шов-шув қилгиси келади. Шундан келиб чиққан ҳолда, бизни умумий маълумот беряпти ёки ҳолатни тўлиқ очиб бермаяпти, деган фикрлар келиб чиқади.
Кўрсатувни тўлиқ тарзда “Дарё”нинг YouTube’даги саҳифаси орқали томоша қилиш мумкин.
Изоҳ (0)