“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 16-сони мавзуси “Ички ишларнинг ички ишлари” бўлиб, дастур меҳмони сифатида ИИВ матбуот котиби Шоҳрух Ғиёсов таклиф этилди.
— Ички ишлар органлари инсон ҳуқуқлари, уларнинг шаъни, қадр-қиммати ва махфий маълумотлар билан иш олиб боради. Маълумотни жамоатчиликка бераётганимизда доим шов-шув туғдирмаслик, тергов фаолиятига халақит бериб қўймаслик ёки бузиб талқин қилинадиган маълумотларни узатмаслик учун қайси ҳажмда бериш мумкин, деган муаммо туғилади. Тергов, жиноят қидирув йўналиши ёки кўчада содир бўлган бирор ҳодиса бўйича саволлар кўп бўлади. Матбуот котиби ҳамма нарсани билмайди, биз жойларга чиқиб батафсил сўраб оламиз. Олган маълумотимизни кўриб чиққандан кейин, жамоатчиликка эълон қиламиз.
Кўпинча бир инсон ҳуқуқини таъминлаш учун бошқа фуқаронинг ҳуқуқларини чеклашга мажбур бўламиз. Шундай ҳолларда ҳуқуқий баҳо берилишини кутишга мажбурмиз. Ҳақиқатан нима ҳолат бўлган, ким айбдор (албатта, бунга суд баҳо беради), бирламчи маълумотни ҳам иложи борича холис беришга ҳаракат қиламиз. Шунақа пайтларда биз маълумот беролмаслигимиз ёки кутиб туришимиз мумкин. Бу эса ўша маълумотнинг тарқаб кетишига, шов-шув, миш-мишлар келиб чиқишига сабаб бўлади. Бу оғриқли масала.
Мен доим журналистларга оддий одам сифатида тушунтиришга: ўзи ҳолат бунақа, лекин биз жамоатчиликка шундайлигича беролмаймиз, бироз сабр қилсангиз, ҳолатни тушунтириб беришим мумкин, деб очиқ, самимий мулоқот қилишга уринаман. Буни кўпчилик тушунади, айримлар тушунмаслиги мумкин. Баъзи ҳолларда Telegramъдаги журналистлар гуруҳларида ёзишиб турамиз, уларга тушунтиришга ҳаракат қиламан, лекин мен айтган гапни олиб чиқариб юбораверишади. Бирор ҳолатда ҳазил, киноя қилиб ёзасиз, уни ҳам чиқариб юборишади. Шундан кейин қатиқни ҳам пуфлаб ичадиган бўлиб қолганман, — дейди Шоҳрух Ғиёсов.
Кўрсатувни тўлиқ тарзда “Дарё”нинг YouTube’даги саҳифаси орқали томоша қилиш мумкин.
Изоҳ (0)