Аҳоли қулайлиги учун янги лойиҳа: Мобил тиббиёт пунктлари

Тошкент шаҳар ҳокими вазифасини бажарувчи Бахтиёр Раҳмоновнинг қарорига кўра, пойтахтдаги 40 та маҳаллага ўрнатилган контейнерларда тиббиёт пунктлари ташкил этилиши белгиланган. 

Ижтимоий тармоқларда бу қарор кўплаб муҳокамаларга сабаб бўлди. Кўпчилик фойдаланувчилар ушбу тиббий контейнерлар қишда совуқ, ёзда иссиқ бўлиши, беморлар учун яна кўплаб ноқулайликлар келтириб чиқариши мумкинлиги бўйича хавотир билдиришди.

Гўёки сифатли, шинам, барча шароитларга эга оилавий поликлиникалар қуриш ўрнига мутасаддилар битта контейнер ўрнатиш орқали муаммони осонгина ҳал қилмоқчидек туюлди бу қарор.

Аммо ҳозир жамиятда “урфга айланган” масаланинг моҳиятини тўлиқ англамай туриб, шошилиб муносабат билдиришдан тийилиб, Соғлиқни сақлаш вазирлигининг изоҳига қулоқ туцак, аслида бу қарор кўплаб инсонлар учун қулайлик туғдириш мақсадида қабул қилинганини кўриш мумкин.

ССВнинг таъкидлашича, аввало бундай тиббий пунктларга электр энергия ва сув тармоқлари тортилиб, иссиқ ҳамда совуқ кунларда ҳаво мўтадиллигини таъминловчи мосламалар ўрнатилади.  Қисқача айтганда, рисоладаги поликлиникада қандай шароит бўлиши керак бўлса, шундай шароит яратилади.

Мобил тиббиёт пунктлари нима ўзи?

Мобил тиббиёт пунктлари контейнерлардан ташкил этилиб, барча зарур дори-дармонлар, керакли тиббий буюмлар, жумладан, ЭКГ ва 18 турдаги тиббий асбоб-ускуна ҳамда жиҳозлар билан таъминланади. Эрталаб соат 8:00 дан кечки 20:00 гача ишловчи икки койкали “кичик шифохона”да умумий амалиёт шифокори ва 2 нафар ҳамшира аҳолига мобил тиббий хизмат кўрсатади.

Лойиҳага қанча маблағ ажратилади?

Ушбу пунктларни жиҳозлаш, уларнинг узлуксиз фаолиятини таъминлаш Тошкент шаҳар ҳокимлиги томонидан амалга оширилади. Бундай тиббиёт пунктларини ташкил қилиш учун 900 миллион сўм маблағ ажратилади. Йил давомида шаҳар бўйлаб жами 170 та контейнер ўрнатилиши режалаштирилмоқда.

Мақсад нима?

Бундай маҳалла тиббиёт пунктлари диспансер назоратида турган кексалар, ҳомиладор аёллар ва болаларни тиббий кўрикдан ўтказишда оилавий шифокорга катта енгиллик беради. 

Фуқароларнинг оддий кўриклар учун ўз ҳудудидаги поликлиникага қатнашига зарурат қолдирмайди. Чунки улар пойтахтнинг аҳоли гавжум бўлган кўп қаватли уйлари ёнига ўрнатилади.

Бу тиббий пунктлар беморларнинг стационар даволанишига эмас, балки уларга бирламчи тезкор хизмат кўрсатиш учун мўлжалланган. Ажратилаётган маблағлар эса кичик “поликлиника”да ҳам худди оилавий поликлиникалардаги шароитларни ҳозирлаш учун сарфланади.