Жиззах, Тошкент ва Бухоро вилоятларида газдан ноқонуний фойдаланиш ҳолатлари аниқланди

Бош прокуратура ҳузуридаги департамент яна бир қатор ҳудудларда газдан ноқонуний фойдаланиш ҳолатларига чек қўйди.

Департаментнинг Зарбдор туман бўлими томонидан «Ҳудудгаз Жиззах» ГТФ туман газ таъминоти ходимлари билан ҳамкорликда ўтказилган терговга қадар текширувда, фуқаро Б.Д. «З.п.» МЧЖга қарашли паррандачилик биносини ҳеч қандай шартнома ва бошқа рухсат берувчи ҳужжатларсиз ўзбошимчалик билан юқори босимли газ тармоғига улаб, 376,9 минг куб метр табиий газдан ноқонуний фойдалангани оқибатида давлат ва жамият манфаатларига 248,8 миллион сўм зарар етказгани аниқланган.

Департаментнинг Тошкент туман бўлими томонидан ИИБ, «Ўзнефтегазинспекция» ва туман газ таъминоти бўлими ходимлари билан ҳамкорликда ўтказилган тезкор тадбирда, «Х.» МФЙда яшовчи М.А. рақамсиз уйда жойлашган иссиқхонани ўзбошимчалик билан газ тармоғига улаб, 154,9 минг куб метр табиий газдан ноқонуний фойдалангани оқибатида давлат ва жамият манфаатларига 154,9 миллион сўм зарар етказгани аниқланган.

Департаментнинг Бухоро вилоят бошқармаси томонидан «Ҳудудгаз Бухоро» ГТФ Ромитан туман газ таъминоти бўлими ходимлари билан ҳамкорликда ўтказилган терговга қадар текширувда, «Р.т.» МЧЖ раҳбари З.А. корхонага қарашли иссиқхонанинг газ тармоғи назорат тамғасини бузиб, 141,6 минг куб метр табиий газдан ноқонуний фойдалангани оқибатида давлат ва жамият манфаатларига 141,6 млн сўм зарар етказгани аниқланган.

Мазкур ҳолатлар юзасидан Жиноят кодексининг 169-моддаси (ўғрилик) ва 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.

Мавзуга доир:

• Тошкент вилоятида 3 та иссиқхона қарийб 90 млн сўм зарар етказди
• Бухоро ва Андижонда газ таъминотига ноқонуний уланиб, умумий 300 млн сўм зарар етказган фуқаролар ушланди