Ҳатто уйқусизлик ҳам қорин соҳасидаги ортиқча ёғларнинг сабаби бўлиши мумкин. «Новий очаг» нашри санаб ўтган қуйидаги зарарли одатлардан воз кечиш ортиқча вазндан қутилишга ёрдам беради.
Ортиқча вазн ёқимсиз, лекин у асосан оёқ-қўлларда тўпланса, нисбатан хавфсиздир. Аммо қорин соҳасида ёғ тўплана бошлагач, чора кўрилмаса, вазият жиддийлашади. Баъзида тўсатдан пайдо бўлган қорин соғлиқни текшириш учун имкониятдир: қондаги глюкозанинг бузилиши, ҳужайраларнинг инсулинга чидамлилигининг ўзгариши, гормонлар мувозанатининг бузилиши ва стресснинг узоқ вақт таъсир қилиши бунинг сабаби бўлиши мумкин. Қорин эса кўпинча зарарли одатлар туфайли пайдо бўлади.
Чекиш
Биринчидан, чекиш пайтида кўп ҳаво ичга ютилади, бу эса қорин шишишига ёрдам беради. Иккинчидан, тамаки ва унинг тутуни таркибидаги заҳарли моддалар ичакларнинг нормал ишлаши учун масъул бўлган фойдали бактерияларни ўлдиради. Учинчидан, чекиш энг зарарли одат бўлиб, ундан қанчалик тез воз кечилса, шунча яхши.
Спиртли ичимликлар ичиш
Ҳар қандай спиртли ичимликда мавжуд калориялар тезроқ семиришга ёрдам беради. Спиртли ичимликларни мунтазам истеъмол қилиш, ҳатто кичик дозаларда ҳам, метаболизмни секинлаштиради ва организм ёғни энергияга айлантирмайди, балки уни тўплайди. Қолаверса, улар овқат ҳазм қилиш трактида яшовчи фойдали бактерияларни йўқ қилади ва бу қоринда ёғ тўпланишига сабаб бўлади.
Газли ичимликларга муҳаббат
Қорин дам бўлишининг яна бир сабаби — газланган ичимликлардир. Эрталаб ёқимсиз ҳолатга тушишни истамайдиганлар ётишдан камида икки соат олдин газли ичимликлар ичишни тўхтатиши ёки уларни бутунлай тарк этиш керак. Газланган ичимликлар метаболизмни секинлаштиради ва ички органлар учун зарарли. Шунинг учун қориннинг текислиги улардан қочишнинг афзалликларидан биридир.
Кўп қаҳва ичиш
Қаҳва пешоб ҳайдовчи ҳисобланади ва у қанча кўп ичилса, организмда шунчалик кам сув ва туз қолади, деб тахмин қилиш мантиқан тўғри. Аммо, афсуски, амалда ҳамма нарса бошқача ва кофеинни кўп қабул қилиш сувсизланишга, овқат ҳазм қилиш тизимининг ёмонлашишига ва натижада метаболизмнинг секинлашишига олиб келиши мумкин. Шунинг учун қориндаги ёғлардан халос бўлишни истовчиларга камроқ қаҳва ичиш тавсия этилади.
Нотўғри овқатланиш
Тўғри овқатланишга риоя қилиш жуда муҳим: нонуштани ўтказиб юбормаслик, ётишдан уч соат олдин овқатланмаслик, овқатланиш оралиғида узоқ танаффуслар қилмаслик лозим. Ушбу оддий қоидалар метаболизмни тиклашга ёрдам беради ва организмда тўпланаётган ёғларни эритиш осонлашади.
Уйқуга риоя қилмаслик
Кечаси етарлича ухлаш жуда муҳим ва бу уйқу тўлиқ, чуқур ва узлуксиз бўлиши лозим. Акс ҳолда стресс гормони кортизол ишлаб чиқарилиши ортади, бу эса қорин соҳасидаги ортиқча ёғларнинг кўпайишига ҳисса қўшади.
Мавзуга доир:
Изоҳ (0)