Ўзбекистонда ўзганинг яланғоч фото ёки видеоларини тарқатиш билан қўрқитганлар 180 млн сўмгача жаримага тортилиши кутилмоқда

Ўзбекистонда шахс ҳаётининг сир тутиладиган томонларини акс эттирувчи маълумотларни ошкор қилганлик учун жиноий жавобгарлик белгиланмоқда.

Адлия вазирлиги томонидан хотин-қизлар, болалар ва кекса ёшдаги ота-оналарнинг ҳуқуқларини ҳимоя қилувчи қонун лойиҳаси ишлаб чиқилиб, жамоатчилик муҳокамаси учун эълон қилинди. Ҳужжатда хотин-қизлар, болалар ҳуқуқий ҳимояси тизимини кучайтириш мақсадида янги жавобгарлик турларини жорий этиш таклиф этилмоқда.

Хусусан, интим ҳаёт дахлсизлигини бузганлик учун жиноий жавобгарлик белгиланмоқда.

Қонун лойиҳасига кўра, Жиноят кодекси қуйидаги мазмундаги 141-3-модда билан тўлдирилади:

«Шахснинг розилигисиз унинг танасининг ва (ёки) жинсий аъзоларининг яланғоч ҳолдаги фото ёки видеотасвирини ўз ичига олган маълумотларни тарқатиш, шу жумладан оммавий ахборот воситаларида, телекоммуникация тармоқларида ёки интернет жаҳон ахборот тармоғида тарқатиш ёки бундай маълумотларни тарқатиш билан қўрқитиш — базавий ҳисоблаш миқдорининг 400 бараваридан 600 бараваригача (120 миллион сўмдан 180 миллион сўмгача) миқдорда жарима ёки 360 соатгача мажбурий жамоат ишлари ёхуд уч йилгача ахлоқ тузатиш ишлари билан жазоланади.

Ўша ҳаракатлар:

а) такроран ёки хавфли рецидивист томонидан;

б) бир гуруҳ шахслар томонидан олдиндан тил бириктириб;

в) вояга етмаган шахсга нисбатан содир этилган бўлса

360 соатдан 480 соатгача мажбурий жамоат ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади».

Адлия вазирлигининг маълум қилишича, Канада, Германия, Англия, Шотландия, Япония, Австралия, АҚШда бу ҳаракатлар учун жиноий жавобгарлик белгиланган.

Ушбу қонун лойиҳаси муҳокамаси 26 январга қадар давом этади.