2022 йил охирида Ҳиндистон аҳолиси, World Population Review (WPR) ҳисоб-китобларига кўра, 1,417 миллиард кишини ташкил қилди — бу Хитой аҳолисидан 5 миллионга кўп демакдир, у ерда эса, расмий маълумотларга кўра, кўрсаткич 1,412 миллиард кишига тенг бўлган. Бу ҳақда Bloomberg хабар берди.
БМТ Ҳиндистон Хитойдан ўзиб кетиб, аҳоли сони бўйича дунёда етакчига айланишини башорат қилган эди, аммо бу кейинроқ юз беришини кутганди. WPR’нинг 18 январдаги маълумотларига кўра, Ҳиндистон аҳолиси яна кўпайиб, 1,423 миллиард кишига тенглашган. Macrotrends тадқиқот платформаси ҳисоб-китоблари бўйича ҳам бу кўрсаткич 1,423 миллиардни ташкил қилади.
Ҳиндистон ўз аҳолиси сони ҳақида янги маълумотларни расман эълон қилгани йўқ. Мамлакат одатда ҳар ўн йилда бир марта аҳолини рўйхатдан ўтказади, бироқ 2021 йилда бу пандемия туфайли кейинга қолдирилганди.
БМТ прогнозига кўра, Ҳиндистон ва Хитой ўртасида аҳоли сони бўйича фарқ яқин йилларда сезиларли даражада ортиб боради. 2050 йилга келиб, Ҳиндистон аҳолиси 1,688 миллиард кишини ташкил қилади, Хитойда эса 1,317 миллиард киши яшайди, деган фикрда ташкилотдагилар.
Умуман олганда, Конго Демократик республикаси, Миср, Эфиопия, Ҳиндистон, Нигерия, Покистон, Филиппин ва Танзания аҳолиси энг кўп ўсиши кутилмоқда. БМТ прогнозига кўра, 2050 йилгача кутилаётган аҳоли сони ўсишининг ярмидан кўпи шу мамлакатлар ҳиссасига тўғри келади.
Эслатиб ўтамиз, 2022 йилда Хитой аҳолиси сони 850 минг кишига қисқариб, 1 миллиард 411 миллион 750 минг кишига тушиб қолди. Сўнгги марта бу кўрсаткич 1961 йилда, мамлакатда оммавий очарчилик кузатилган вақтда пасайган эди. Бир йил ичида мамлакатда 9,56 миллион киши туғилиб, 10,41 миллион киши вафот этган.
Изоҳ (0)