Глобал инфляция энг юқори чўққига чиқди, аммо унинг таркибий қисмлари ҳали ҳам бир қатор мамлакатларда ўсиб бориши мумкин. Бу ҳақда Халқаро валюта жамғармаси (ХВЖ) бошқарувчи директорининг биринчи ўринбосари Гита Гопинатҳ Давосдаги Жаҳон иқтисодий форумида маълум қилди.
«Бизнинг ҳисоб-китобларга кўра, глобал инфляция аллақачон энг юқори чўққига чиқди. Аммо бу ҳодисанинг таркибий қисмларига, масалан, хизмат кўрсатиш соҳасидаги инфляцияга келсак, у ҳали ҳам ўсиб бораётган мамлакатлар бор», — деди у.
Расмийнинг қўшимча қилишича, 2023 йил дунё учун «қийин» йил бўлса-да, ХВЖ ҳеч бўлмаганда жорий йилнинг январь ойи охирида кетма-кет тўртинчи марта глобал ўсиш прогнозини пасайтирмасликни режалаштирмоқда.
«Уч марта кетма-кет пасайишдан сўнг, ҳеч бўлмаганда, бу сафар биз энг ёмон сценарийни кутмаймиз», — деб тушунтирди у.
2021 йил октябрь ойидан буён ХВЖ глобал ўсиш прогнозини уч марта пасайтирди. Сўнгги маълумотларга кўра, жамғарма жорий йилда глобал ялпи ички маҳсулот ўсиши 2,7 фоизгача секинлашишини тахмин қилмоқда.
Давосдаги форумда сўзга чиққан ХВЖ бошқарувчи директори Кристалина Георгиева бу кўрсаткич 2023 йилда пастга тушишини, аммо келгуси йилда глобал иқтисодий ўсиш тезлашишини таъкидлади.
Аввалроқ Жаҳон иқтисодий форумининг экспертлари 2023 йилда жаҳон иқтисодиётида рецессия юз беришини прогноз қилгани ҳақида хабар берилганди.
Изоҳ (0)