Ўзбекистон президенти Шавкат Мирзиёев Сингапур президенти Ҳалима Яқубнинг таклифига биноан 16-18 январь кунлари давлат ташрифи билан ушбу мамлакатда бўлади. Ташриф дастурига мувофиқ Сингапур Президенти Ҳалима Яқуб ва мамлакат Бош вазири Ли Сян Лун билан олий даражада учрашув ва музокаралар ўтказилиши режалаштирилган.
Кун тартибидан кўп қиррали Ўзбекистон-Сингапур муносабатларини янада кенгайтириш ва мустаҳкамлашнинг долзарб масалалари ўрин олган. Шавкат Мирзиёев Сингапурнинг етакчи компаниялари раҳбарлари билан учрашув ўтказиши, ташриф арафасида икки мамлакат ишбилармон доираларининг бизнес форуми бўлиб ўтиши белгиланган.
Дипломатик муносабатлар тарихи
Тарихга назар ташлайдиган бўлсак, Сингапур республикаси Ўзбекистон мустақиллигини 1992 йил 27 декабрда тан олган. Дипломатик муносабатлар эса 1997 йилнинг 8 апрелида ўрнатилган. 2007 йилда Сингапурда мамлакатимиз элчихонаси фаолиятини бошлаган. Ушбу давлатга илк расмий ташриф 2007 йилда Ўзбекистоннинг Биринчи президенти Ислом Каримов томонидан амалга оширилган.
Парламентлараро муносабатлар 2009 йилда бошланган бўлса, ҳукуматлараро сиёсий алоқалар 2013 йилдан мунтазам йўлга қўйилган. Сингапур БМТ га доирасида Ўзбекистон томонидан илгари сурилган 6 та резолюцияни қўллаб-қувватлаган ҳамда айни вақтда Ўзбекистоннинг бутунжаҳон савдо ташкилотига аъзо бўлиши бўйича тузилган ишчи гуруҳ вакили саналади.
Савдо-иқтисодий ҳамкорлик
2007 йилдаги «Ўзбекистон Республикаси ҳукумати ва Сингапур Республикаси ҳукумати ўртасида иқтисодий ва гуманитар ҳамкорликнинг асосий йўналишлари тўғрисидаги битим»нинг 3-моддасига мувофиқ, ўзаро савдода икки мамлакат ўртасида энг қулай режим ўрнатилган. Товар айланмаси, экспорт ва импорт муносабатлари 2017 йилдан 2022 йилгача бўлган даврда йил сайин юқори динамикани намойиш этмоқда. Экспорт асосини қора металл ва унинг маҳсулотлари, қурилиш хом-ашёси, хизматлар соҳаси ва бошқалар ташкил этса, импорт ҳажмининг катта фоизи хизматлар соҳаси, каучук, резина ва улардан тайёрланган маҳсулотлар, оптик мосламалар, тўқимачилик маҳсулотлари ҳиссасига тўғри келади. Ўзбекистонинг барча турдаги мева-сабзавот маҳсулотлари экспортига рухсат олинган.
Жами йиғилган Сингапур сармояси 2016-2022 йилларда 700 миллион долларни ташкил этди. 2022 йилда қатор лойиҳаларни амалга ошириш доирасида 38 миллион долларлик инвестициялар ўзлаштирилди. Асосий сармоявий ҳамкор сифатида «Индорама cорпоратион»ни эътироф этиш мумкин. Корпорация 2010 йилдан буён 650 миллион доллар эвазига 3 та сармоявий лойиҳани татбиқ қилди.
Сингапурлик ҳамкорлар ёрдамида 4 миллиард доллардан ортиқ маблағга 15 та янги сармоявий лойиҳалар рўйхати тузилди. 2022 йилнинг 1 декабрь ҳолатига кўра Ўзбекистонда сингапурлик сармоядорлар иштирокида тузилган 105 та корхона фаолият олиб бораётган бўлиб, улардан 61 таси якка тартибдаги тадбиркор, 44 таси хорижий корхона саналади. Асосий соҳалар сифатида электротехника, тўқимачилик ва озиқ-овқат саноати, таълим, савдо, автомобилсозлик кабиларни таъкидлаш мумкин.
Маданий-гуманитар ҳамкорлик
Ўзбекистон ва Сингапур ўртасидаги маданий-гуманитар соҳадаги ҳамкорликнинг ёрқин намунаси сифатида Сингапур ижодий гуруҳларининг мунтазам равишда «Шарқ тароналари» фестивалидаги иштирокини таъкидлаш мумкин. Бундан ташқари таълим соҳасидаги яқин ҳамкорликнинг истиқболларини эътироф этиш лозим.
2008 йилдан буён Тошкентда Сингапур менежментни ривожлантириш институтининг филиали фаолият олиб боради. 2021 йилда Сингапурдаги ТМC академиясининг филиали саналган Тошкент технология, менежмент ва коммуникациялари (ТМC) институти ишлаб келмоқда. Олий ўқув юрти келишувига асосан умумий даромаднинг 1 фоизи БМТнинг Оролбўйи ҳудудларида инсон хавфсизлиги бўйича кўп партиявий траст фондига ўтказиб келинмоқда.
Сингапурнинг «Сих Cloudс» компаниясининг инглиз тилини ўрганиш бўйича интерактив онлайн дастури Қорақалпоғистон Республикасининг 300 та мактаби (2021 йил апрелдан 2021 йил декабригача), шунингдек, Ўзбекистоннинг 14 та Президент мактаби (2020 йил 1 сентябрдан 2025 йил 31- августгача) учун ишга туширилган.
2018 йилда Сингапурнинг «Модерн Монтессори International» компанияси ҳамда Мактабгача таълим вазирлиги ўртасида Тошкент шаҳрида «Модерн Монтессори International» мактабгача таълим муассасасини ташкил этиш тўғрисида ўзаро англашув меморандуми имзоланди.Ўзбекистон бугунги кунда кадрлар тайёрлаш ва уларнинг салоҳиятини ошириш йўналишида ҳам Сингапур билан яқиндан ҳамкорлик қилади.
2018 йилдан бошлаб Сингапур фуқаролари учун Ўзбекистонда 30 кунлик визасиз тартиб жорий этилган.
Изоҳ (0)