Тошкент шаҳри Шайхонтоҳур туманида 7 январь куни фуқаро хотини ҳақида ножўя гаплар айтган танишини ўлдириб қўйди. Бу ҳақда Тергов департаменти хабар қилди.
Қайд этилишича, шу куни соат 11:00 ларда Шайхонтоҳур тумани «Тинчлик» маҳалласи Г.Узоқов кўчасида яшовчи С.Р. (38 ёшли) ва таниши К.А. (38 ёшли биргаликда Рождество байрамини нишонлаш мақсадида спиртли ичимликлар сотиб олиб, С.Р.нинг хонадонида уларни истеъмол қилган. Ўрталарида келиб чиққан ўзаро келишмовчилик оқибатида хонадон эгаси С.Р. танишининг бошига қўлида бўлган шиша идиш билан бир маротаба уриб, унга тан жароҳати етказган.
Оқибатда К.А. тез ёрдам келгунига қадар бош чап томон чакка соҳаси тан жароҳати билан ҳодиса жойида вафот этган.
Ҳолат юзасидан Жиноят кодекснинг 104-моддаси 3-қисми «д» банди (қасддан баданга оғир шикаст етказиш) билан жиноят иши қўзғатилган. С.Р. гумон қилинувчи тариқасида жиноят ишида иштирок этишга жалб қилиниб, процессуал тартибда ушланган.
Тергов давомида жиноятнинг келиб чиқиш сабаби ўрганилганда шу куни гумон қилинувчининг уйига меҳмонга келган таниши, унинг турмуш ўртоғи тўғрисида айтган гапларидан жаҳли чиқиб, ўзининг қўлида бўлган шиша идиш билан К.А.нинг бош чакка қисмига ургани аниқланган. Ҳозирда тергов давом этмоқда.
Бу турдаги жиноятлар учун Жиноят кодексининг нормаларига кўра, 8 йилдан 10 йилгача озодликдан маҳрум қилиш жазоси белгиланган.
Изоҳ (0)