10 январь куни АҚШнинг энг йирик криптовалюта биржаси Coinbase ўзининг операцион харажатларини 25 фоизга қисқартириш тўғрисидаги қарорини эълон қилди. Бу 950 та иш жойини қисқартиришни ўз ичига олади – компания умумий ходимларининг 20 фоизи.
Ўтган йилнинг июнь ойида компания «иқтисодий инқироз даврида бизнес барқарорлигини сақлаб қолиш учун» ходимларнинг 18 фоизини қисқартириши ҳақида эълон қилган эди.
«Coinbase етарлича капиталга эга. Аммо 2022 йилда крипто бозори глобал иқтисодиёт билан бирга пасайишни бошлади. Шунингдек, биз бозордаги баъзи йирик ўйинчиларнинг қулашига гувоҳ бўлдик, бу эса қийин вазиятнинг янада кучайишига олиб келиши мумкин», — деди компания раҳбарияти.
Ўтган йили криптовалюта бозори тез пасайишни қайд этди. Биткоин курси 65 фоизга камайди, энг йирик крипто платформаларидан бири FTX банкрот бўлди ва бу бозорнинг қолган қисмига таъсир қилди.
Аммо Coinbase буларнинг барчаси вақтинчалик қийинчиликлар, деб ҳисоблайди.
«Ҳамма нарсага қарамай, бизнинг компаниямиз ва саноатимиз олдинга силжийди. Мен келажагимизга ҳам, крипто саноати келажагига ҳам оптимистларча қарайман. Тараққиёт ҳар доим ҳам тўғридан-тўғри эмас, баъзида биз икки қадам олдинга ва бир қадам орқага кетади», — дейди Coinbase бош директори Брайан Армстронг.
11 ноябрда Багама оролларида рўйхатга олинган FTX криптовалюта биржасининг оператори FTX Group бизнесни қайта ташкил этиш имконини берувчи 11-боб бўйича банкротлик тўғрисида ариза берган.
Изоҳ (0)