Профессионал бокснинг биринчи ярим енгил вазн тоифасида (-55,3 кг) WBA ва IBF камарлари соҳиби Муроджон Аҳмадалиев (11-0, 8 КО) ва IBF йўналишидаги мажбурий даъвогар Марлон Тапалес (36-3, 19 КО) ўртасидаги жанг бўйича келишувга эришилди.
IBF ташкилоти ушбу баҳсга буйруқ бериб, 3 январь кунига промоутерлик савдосини белгилаган эди. Бироқ боксчиларнинг жамоалари бир тўхтамга келгач, кимошди савдоси бекор қилинган.
Ҳозирча тўқнашув санаси ва манзили ҳақида маълумот берилмаган. Аммо катта эҳтимол билан жанг 2023 йилнинг биринчи чорагида ёки апрель ойида бўлиб ўтиши кутилмоқда.
Эслатиб ўтамиз, филиппинлик боксчи сўнгги жангини 2022 йилнинг май ойида ўтказиб, унда мексикалик Хосе Эстрадани мағлубиятга учратган. Аҳмадалиев эса 2022 йилнинг июнида америкалик Ронни Риосни мағлуб этиб, камарларини ҳимоя қилганди.
Изоҳ (0)