Бош прокуратура ҳузуридаги департаментнинг маъмурий биносини таъмирлашда қатнашган тадбиркор салкам 600 миллион сўм миқдоридаги иш ҳақини ололмаётгани ҳақида хабар берилганди. Мазкур воқеага муносабат билдирган департамент масъуллари буюртмага кўра, иш бажарувчиларга 8 миллиард 600 миллион сўм миқдоридаги маблағ тўлаб берилганини билдирганди.
Тан олиш керак, ўша танқидий чиқишдан сўнг ҳаракат бошланганди. Аммо бу сафар ҳам алдашди. Тадбиркор қамоқдан чиқиб келди. Мен билан учрашиб, бир ой ичида барча пулларни беришини айтди. Сўнгра айтилган муддатда пулни беролмагач, яна муддат сўради. Бугунги кунга келиб эса, Янги йил байрамигача ҳаракат қилиб, имкониятим етганича қилиб бераман деган гапни айтяпти, — дейди пулини ололмаётганини айтган тадбиркор Жасур Намозов.
Тадбиркор пойтахтда, раҳбарлар кўз ўнгида шундай адолатсизлик бўлса-да, масъуллар бунга эътибор қаратмаётганини айтмоқда.
Фуқаро сифатида муаммоларни айтяпмиз. Раҳбарлар бу муаммоларни эшитиб турса-да, кўраётган бўлса-да, жим турибди. Ёрдам бериш, ҳал этиш деган масала бўлмаяпти, — дейди мурожаатчи.
Жасур Намозов энг аввало Бош прокуратура ҳузуридаги департаментнинг Дилшод исмли раҳбарига ишонганини, унинг топшириғига кўра таъмирлаш ишларини олиб борганини, аммо бугунги кунга келиб, пулини ололмай сарсон бўлаётганини айтмоқда.
Энг аввало, департамент бошлиғи Дилшод акага ишонгандим. Дастлаб фирма орқали шартнома қилайлик деганимда Дилшод ака «Қаерда ишлаётганингни биляпсанми? Ўзим барча пулларингни олиб бераман», деганди. Мен айнан шу инсонга ишонгандим, — дейди муаммо билан юзлашаётган тадбиркор.
Пулини ололмаётган ишчиларни ишга жалб қилган қурувчи Жасур Намозовнинг «Дарё» журналисти билан дастлабки суҳбатида у департамент биноси таъмирини бошлашдан аввал Бош прокуратура ҳузуридаги Иқтисодий жиноятларга қарши курашиш департаменти бошлиғи Дилшод Раҳимов билан шахсан кўришганини билдирганди.
Ишни бошлашдан аввал Рустам ака билан гаплашиб, департамент бошлиғи Дилшод аканинг олдига кирганмиз. Дилшод аканинг ўзи бу департамент биноси эканини, шу сабаб бошқаларга нисбатан арзонроқ қилиб, таъмирлаб беришимизни сўради. Бошқа усталар кв/метрини 18 доллардан қилаётган бўлса, мен Дилшод аканинг илтимосига кўра 16,5 долларга туширдим. Қолаверса, Дилшод ака агар фирма орқали пул тўланса, солиқлари билан кўпайиб кетишини айтиб, нақд пул беришини билдирди. Шу келишувга кўра, мен бу бинода 800 миллион сўмлик ишни бажардим. Салкам 40 кишини олиб келиб ишлатдим. Энди эса 600 миллион сўмга яқин пулимизни ололмай сарсонмиз. Менинг нафақат ишчилардан, қурилиш материаллари сотувчи танишларимдан ҳам қарзим бор. Аммо эндиликда Дилшод аканинг олдига олиб киришмаяпти. Атайлаб учраштиришмаяпти, — деганди у.
Мазкур муаммо жамоатчиликка очиқлаганидан сўнг департамент ахборот хизмати «Дарё» интернет нашрига бино таъмири учун Тошкент шаҳар ҳокимлиги ҳузуридаги Ягона буюртмачи инжиниринг компаниясига сўралган пул — 8 миллиард 600 миллион сўмлик пул тўлаб берилганини билдирганди. Ҳокимлик қошидаги инжиниринг компания раҳбарияти ҳам департаментдан олинган пуллар «Саддинисо Ҳабибулло» хусусий корхонаси ҳисоб рақамига ўтказиб берилганини айтди.
Мазкур муаммо кўтарилгач, ҳал этилар деган умидда ҳамон кутяпмиз. Аммо Янги йил яқинлашдики, натижа бўлмаяпти. «Саддинисо Ҳабибулло» хусусий корхонаси раҳбари қамоқдан ҳам чиқди. Икки-уч марта ваъда бериб, пулни қайтариш учун муддат сўради. Аммо айтилган муддатда ҳам ваъдасини бажармаяпти. Биз бу ҳолат юзасидан масъуллардан натижа кутяпмиз. Янги Ўзбекистонда инсон ҳуқуқлари кафолатланиши, ҳар ким меҳнати учун адолатли ҳақ олиши таъминланишидан умидвормиз, — дейди тадбиркор.
Изоҳ (0)