Ноқонуний тамаки контрабандасига қарши курашиш глобал муаммолардан бири. Афусуски, бу Ўзбекистонга ҳам бегона эмас. Октябрь ойида ЎзЛиДеп пресс клубида ўтказилган мулоқотда Алкоголь ва тамаки бозорини тартибга солиш ҳамда виночиликни ривожлантириш агентлиги бошқарма бошлиғи Комил Абдураҳимов Ўзбекистонда сўнги икки йил ичида ноқонуний тамаки маҳсулотлари ҳажми кескин ортганини айтганди.
«Ўрганишлар шуни кўрсатдики, ноқонуний сигареталар айланмаси ҳажми сўнги икки йил ичида 4 фоиздан 15 фоизга ўсган. Айниқса, водий вилоятларида чегарадан кириб келаётган ноқонуний тамаки маҳсулотлари улуши катта. Масалан, Фарғона вилоятида республика бўйича 22,8 фоиз, яъни энг юқори кўрсаткич қайд этилган.
Шунингдек, Тошкент вилоятида 15,4 фоиз, Сирдарёда 9 фоизлик кўрсаткичлар аниқланган. Тамаки маҳсулотлари контрабанда йўли билан мамлакатга олиб кирилаётгани сабабли йилига акциз солиғидан олиниши керак бўлган ўртача 300 миллиард сўм маблағлар давлат бюджетига тушмай қолмоқда», – деди мутахассис.
Давлат божхона қўмитасининг маълум қилишича, 2022 йилнинг ўтган 11 ойи давомида қарийб 19 миллиард 200 миллион сўмлик 1 миллион 578 минг 346 қути ноқонуний тамаки маҳсулотлари ушлаб қолинган.
Мутахассислар ҳамма гап истеъмолчида эканини айтиб келади. Муаммога энг асосий ечим бундай ноқонуний маҳсулотларга бўлган талабнинг йўқолишидир. Контрабанда маҳсулотларига талаб юқори бўлса, чегарадан ноқонуний олиб ўтишга уринишлар камайиб қолмайди. Истеъмолчи ноқонуний маҳсулотлар харид қилишдан воз кечса, контрабанда ҳам ўз ўзидан якунланади.
Изоҳ (0)