Украина президенти Владимир Зеленский қуролли кучларининг Қримни озод қилиш операцияси ҳали бошланмагани, бироқ аҳоли онгида у аллақачон шаклланганини айтди. Президент Франциянинг ТФ1 Инфо телеканалига берган интервьюсида бу ҳақда гапирди.
«Операциянинг ўзи ҳали бошлангани йўқ. У бошланганда албатта хабардор бўласиз. Ишонаманки, Қримни қайтариб олиш одамлар онгида шаклланган. Ички хоҳиш, бунга муносабатнинг бирлиги энг муҳим омилдир», — дейди Зеленский.
Украина раҳбари Қримни нафақат сўз билан, балки уни ҳарбий йўл билан ҳам қайтаришга тайёр бўлиш муҳимлиги, чунки рус ҳарбийлари уни шунчаки тарк этмаслигини айтди.
«Тайёр бўлишимиз ва олға кетишимиз керак. Ҳеч ким Қримдан шунчаки воз кечмайди. Қайта забт этиш ҳамиша жамиятдан бошланади, яъни истак, тайёргарлик. Бошланиш борлигига ишонаман», — деди у.
Зеленский яриморол озод этилгандан кейин денгизга бориш ҳақида берилган саволга ҳам жавоб берди.
«Қримни яхши кўраман. Шунинг учун мен Украина томонидан қайтариб олинган Қримнинг денгизига бораман», — деди президент ва бу ерга 2023 йилнинг ёзида келиш яхши бўлишини айтди.
Оқ уй Украина Қримни қайтариш учун ҳарбий салоҳиятга эга эканини маълум қилганди. Шу билан бирга, АҚШ ҳукумати расмийлари Украина қўшинларининг Қримдаги ҳар қандай кенг кўламли ҳужуми Россияни ядро қуролидан фойдаланишга ундашидан хавотирда.
17 декабрь куни Украина Миллий хавфсизлик ва мудофаа кенгаши котиби Олексий Данилов Қримдаги «окоп»лар рус ҳарбийларига ёрдам бермаслиги, шу учун Украина яқин орада ярим оролни қайтариб олишини айтганди. Қримнинг аниқ қай тарзда озод этилишини Украина ҳарбий-сиёсий раҳбарияти ҳал қилади.
Мавзуга доир:
Изоҳ (1)
борган сари чайналиган сакичга ухшаб боряпти.