Франция терма жамоаси бош мураббийи Дидье Дешам ЖЧ—2022 финали доирасида Аргентинага қарши кечадиган баҳс олдидан ўз фикрлари билан ўртоқлашди.
«Франциянинг мақсади ҳақида
Менда финал олдидан ўзига хос хавотир ва стресс йўқ. Бундай ўйинларга тайёргарлик кўрар экансан, концентрацияни сақлаш керак. Бизнинг мақсад — титулни қўлга киритиш. Биламан, бутун Аргентина, дунё бўйлаб кўплаб мухлислар ва, эҳтимол, айрим французлар Мессининг жаҳон чемпиони бўлишини истамоқда. Бироқ биз ўз мақсадимиз учун барча ишни қиламиз.
Аргентинанинг тактикаси борасида
Адашмасам, ҳозир бу ерда ЖЧ—2018 да тўп сурган етти нафар аргентиналик бор. Бу аниқ аввалги жамоа эмас ва солиштиришда мантиқ йўқ, тўрт йил олдин 1/8 финал эди.
Бошқа томондан турли тактика ва футболчилар билан ҳаракат қилган олти ўйин бизга ёрдам беради. Бизнинг уч нафар кузатувчи уларнинг барча ўйинини кўриб чиқди, бу бизга аниқ маълумотлар олишга имкон беради.
Ҳатто Аргентина финалда янгича бирор услуб қўлласа ҳам биз Марокашга қарши ўйиндаги каби вазиятга мослашамиз. Марокашликлар ўша баҳсда биринчи марта беш ҳимоячи билан ҳаракат қилди. Ҳар қандай вазиятга тайёр туриш лозим.
Мбаппе ҳақида
Гап гапиряпти? Гапириш вақти келганда, у бу ишни қилади. У бор эътиборини майдонга қаратган, ажойиб кайфиятда бўлиб турибди. Унинг хотиржамлигини бузиш ниятим йўқ. Унинг диққат-эътибори жамоада.
Бенземанинг финалга келиш-келмаслиги борасида
Агар бунга жавоб бермаса, сиз жаҳл қилди дейсиз, шу боис айтиб ўтмоқчиман.
Мусобақа олдидан жароҳат олган бир неча футболчи бор эди ва Карим улар қаторида. Ўша вақтдан бери менинг тасарруфимда 24 футболчи бор. Бундай савол бериш юмшоқ қилиб айтганда ўша 24 футболчига нисбатан ҳурматсизлик.
Мен жароҳатланганлар ёки терма жамоанинг собиқ футболчиларини таклиф қилиш билан шуғулланмайман. Кимдир у ерда бўлади, бошқаси йўқ, мен билмайман», — дейди Дешам.
Аргентина ва Франция терма жамоалари ўртасидаги учрашув 18 декабрь куни Ўзбекистон вақти билан 20:00 да бошланади.
Мавзуга доир: Карим Бензема Франция терма жамоаси базасини бош мураббий қарорига кўра тарк этган
Изоҳ (0)