Президент топшириғига асосан, сўнгги уч кунда Тошкент шаҳридаги жамоат транспорти тизимидаги муаммоларни бартарф этиш мақсадида тезкор чоралар амалга ошириляпти. 16—17 декабрь кунлари пойтахтга 204 та автобус олиб келинди ва йўналишга чиқарилди.
Натижада йўналишдаги автобусларнинг ҳаракатланиш оралиқ вақти 25—30 дақиқадан 10-12 дақиқага қисқаради. Шаҳардаги 148 та йўналишнинг 34 таси муаммоли экани аниқланди. Барча йўналишларга 200 дан ортиқ қўшимча автобус жалб этилгач, 17 та йўналишдаги муаммо бартараф этилди, бироқ аҳоли эҳтиёжларини тўлиқ қондириш учун яна 21 та янги автобус йўналиши шакллантирилиши зарур.
Пойтахтдаги 8 та автобус паркининг 1374 та транспорт воситаси тўлиқ техник кўрикдан ўтказилди, улардан техник носоз ҳолатдаги 259 та автобуснинг 89 таси таъмирланди. Ҳайдовчилар танқислигини бартараф этиш мақсадида 2 425 нафар «Д, Э» тоифали ҳайдовчилик гувоҳномасига эга бўлган шахслар рўйхати шакллантирилди, ҳозирга қадар уларнинг 140 нафардан ошиқ ишга қабул қилинди.
Автобус саройларидаги мавжуд иссиқлик, сув ва шу каби бошқа муаммолар бартараф этилди. Бу борадаги ишлар давом этмоқда.
Аввалроқ Шавкат Мирзиёев бош вазирга март ойигача Тошкентга 1000 та автобус олиб келиш бўйича топшириқ бергани ҳақида гапирганди.
Мавзуга доир: Тошкентда автобус ҳайдовчилари ойлиги икки баробарга оширилди
Изоҳ (0)