Халқаро профессионал футболчилар ассоциациялари федерацияси (FIFPro) эронлик футболчининг ўлим жазосига ҳукм қилингани ҳақидаги маълумотга изоҳ берди.
Эроннинг «Трактор Табриз» клуби собиқ ҳимоячиси Амир Наср-Озоданий ноябрь ойи охирида ҳибсга олингани, кейинроқ унинг исми ўлимга ҳукм қилинганлар рўйхатида пайдо бўлгани хабар қилинганди.
Эронда оммавий норозилик намойишлари бўлиб ўтди. Бунга Маҳса Аминийнинг сентябрь ойида «ҳижобни нотўғри ўрагани» учун ҳибсга олиниб, бир муддат полиция бўлимида бўлганидан сўнг вафот этгани сабаб бўлганди.
«FIFPro Эрон ўз мамлакатида аёллар ҳуқуқлари ва уларнинг эркинликларини қўллаб-қувватлаган намойишчиларни қатл қилаётгани ҳақидаги хабарлардан ҳайратда ва ғазабда.
Биз Амир билан биргамиз ва унга берилган жазони зудлик билан олиб ташланишини талаб қиламиз», — дейилади Халқаро профессионал футболчилар ассоциациялари федерацияси ёзган изоҳида.
Изоҳ (0)