Путин 20 декабрь куни биринчи марта янги ҳудудлар раҳбарлари билан учрашиши мумкин

Россия президенти Владимир Путин 2022 йил охиригача ДХР, ЛХР, Запорожье ва Херсон вилоятлари раҳбарлари вазифасини бажарувчилар — Денис Пушилин, Леонид Пасечник, Евгений Балицкий ва Владимир Салдо билан уларнинг янги лавозимида биринчи марта учрашади. Бу ҳақда «Ведомости» газетаси ўз манбаларига таяниб хабар берди.

Кремль сайтидаги маълумотга қараганда, давлат раҳбари улар билан 30 сентябрь куни юзма-юз мулоқот қилган, ўшанда Россия таркибига янги ҳудудларнинг қабул қилиниши ҳақидаги шартномалар имзоланган эди.

Президент маъмуриятига яқин манбалар қайд этишича, Пушилин, Пасечник, Балицкий ва Салдо билан иш юзасидан учрашув 20 декабрь куни бўлиб ўтади.

Раҳбарларнинг Путин билан учрашуви режалаштирилмоқда, бироқ «ҳаммаси президент графигига боғлиқ», деди Давлат думасининг МДҲ масалалари бўйича қўмитаси раисининг биринчи ўринбосари Виктор Водолацкий. У ЛХР билан алоқалар учун ҳам масъулдир.

Унинг фикрича, ҳудудлар раҳбарлари президент билан ҳукумат федерал ҳудудий органлари ваколатхоналарининг очилишини муҳокама қилади. Ҳукумат қарорига кўра, бу иш келаси йил 1 июнигача якунланиши керак.

Водолацкий айтишича, Россия ҳукумати раиси ўринбосари Марат Хуснуллин томонидан тасдиқланган қайта тиклаш режасининг бажарилиши ҳақидаги масалалар ҳам муҳокама этилади.

Россия Украинадаги махсус операцияни 24 февраль куни бошлади. Ўшанда давлат раҳбари унинг мақсади «Киев режими томонидан саккиз йил давомида таҳқирланиб келаётган ва геноцидга учраётган одамларни ҳимоя қилиш», шунингдек, Украинани «демилитаризация ва денацификация қилиш» (қуролсизлантириш ва натсизмни йўқотиш)дан иборат эканини айтганди.

7 декабрь куни Путин Украинадаги ҳаракатлар натижаси кўриниши учун узоқ вақт талаб этилиши мумкинлигини айтди, аммо Россияда янги ҳудудлар пайдо бўлганининг ўзи «барибир кўзга кўринарли натижа» эканини таъкидлади. Шунингдек, у Азов денгизи Россиянинг ички денгизига айланганини қайд этди.