Фарғонада тез ёрдам машиналари 4 соатлаб газ заправкада туриб қолгани ҳақидаги хабарлар рад этилди

Ижтимоий тармоқларда Фарғона вилоятининг Қўштепа туманидаги саккизта тез ёрдам машинаси 4 соат деганда газ заправкага киргани ҳақида хабарлар тарқалди. Вилоят Соғлиқни сақлаш бошқармаси буни рад этди.

«Шу йилнинг 13 декабрь куни соат 6:00 ларда Қўштепа туманидаги «Safe Fergana Gaз» МЧЖ га қарашли қуйиш шохобчасида икки дона тез ёрдам машинаси 15 дақиқадан кўп бўлмаган вақтда газ билан таъминланиб, хизматга йўл олган. Хабарда айтилган саккизта автомашина ва уларнинг узоқ вақт кутиб қолгани ёлғон», — дейилади хабарда.

Қайд этилишича, бугунги кунда Қўштепа туманида 15 дона тез тиббий ёрдам автомашиналари бўлиб, улар газ ва бензинга мослашган. Чақирувларга кечиктирилмасликнинг олдини олиш мақсадида тез тиббий ёрдам автомашиналари бензин захираси билан таъминланган. Ҳозирда тез тиббий ёрдам автомашиналарига газ қуйиш график асосида таъминланмоқда. Муаммолар кузатилгани йўқ.

Фарғона вилояти Соғлиқни сақлаш бошқармаси фуқаролардан ижтимоий тармоқларда асосланмаган маълумотлар тарқатмасликни, ноўрин хулосага бормасликни сўради.

Мавзуга доир: Бензиннинг арзонлашиши Андижон ва Наманганда навбатларни юзага келтирган бўлса, Фарғона ва Қорақалпоғистонда ёнилғининг «йўқолиб қолиши»га сабаб бўлди (фото, видео)