Украина президенти Владимир Зеленский Донецк вилоятининг Словянск шаҳрига ташриф буюрди ва украиналик ҳимоячиларни 6 декабрь — Украина Қуролли кучлари куни билан табриклади. Давлат раҳбари ўзининг видеомурожаатини ижтимоий тармоқларда эълон қилди.
«Ҳурматли ҳимоячилар, давлатимизни кеча-ю кундуз, аёзда, иш куни ва байрамларда ҳимоя қилмоқдасиз. Ҳар куни сизнинг жасоратингизни эслаймиз ва ишингизга ёрдам берамиз», — деган Зеленский.
Президент бугунги кунни Украина ҳарбийлари билан бирга Донбассдаги фронтда ўтказишини айтди. У Украина Қуролли кучлари сафига жалб қилинган барча шахсларнинг профессионаллигини айтиб, давлатни ҳимоя қилгани учун уларга миннатдорлик билдирди.
«Бутун дунё сизнинг кучингизни, маҳоратингизни, меъёрларингизни — Украина стандартларини кўриб турибди. Сиздаги қаҳрамонлик учун ота-онангиздан, рафиқангиз ва болаларингиздан миннатдорман. Бутун Украина сизга ишонади ва ёрдам беради», — дея қўшимча қилди Зеленский.
Президент, шунингдек, украиналик ҳимоячилар Украинани озод қилиш учун қийин йўл босаётганини айтди. Унга кўра, давлатнинг тўлиқ мустақиллигига эришиш Донецк, Луганск ва Қримни озод қилиш ҳисобланади.
«Барча ҳаракатлар эркинликка, барча қадамлар ғалабага етаклайди», — дея хулоса қилди у.
Мавзуга доир: Зеленский Украина Қримни хоҳ ҳарбий, хоҳ дипломатик йўл билан қайтариб олишга тайёрлигини айтди
Изоҳ (0)