Тарихдаги энг йирик радиотелескоп қурилиши бошланди (видео)

5 декабрь куни Австралия ғарбида тарихдаги энг катта радиотелескоп қурилиши бошланди, деб хабар бермоқда Euronews.

Лойиҳа SKА — «бир километр квадрат майдондаги антенналар панжараси» деб номланган бўлиб, тахминан шунча майдонда ўн минглаб антенналар жойлашади ва бир бутун тизим сифатида ишлайди.

Австралиядаги мажмуа Жанубий Африкада жойлашган худди шундай мажмуа билан биргаликда фаолият олиб боради — у эса бир неча йил аввал ишга туширилганди.

«Бир-бирини тўлдирувчи иккита телескоп қурилиши якунланганидан кейин, сайёранинг икки бурчагида жойлашган иккита қулоғига айланади ва бизга олам қаъридан келаётган энг аҳамиятсиз товушларни ҳам эшитиш имконини беради — ахир айнан улар илм-фанда шов-шувни юзага келтириб, бизнинг олам ва ҳаётнинг келиб чиқиши ҳақидаги тушунчамизни чуқурлаштиради», — деди Буюк Британия бизнес, энергетика ва саноат стратегияси ишлари бўйича вазир Жорж Фриман.

Доктор Сара Пирснинг айтишича, SKА обсерваторияси Ердан ўнлаб ёруғлик йили масофасида жойлашган юлдуз атрофида айланаётган сайёрадаги оддий аэропортнинг фаразий радарини ёки бўлмаса, 225 миллион километр узоқликда Марсдаги астронавтнинг чўнтагида турган мобил телефон сигналини таниб олиши мумкин.

Қурилиш 2028 йилга келиб якунланиши керак. Катта кўламли лойиҳада 14 та мамлакат олимлари ва муҳандислари қатнашмоқда. Уларнинг сўзларига кўра, телескоп осмонни ҳозиргидан ўн минг марта тезроқ сканерлаш имконини беради.

Мажмуа умумий нисбийлик назариясини текширади ва гравитация тўлқинларини излайди, шунингдек, Катта портлашдан кейинги, илк юлдузлар энди шаклланаётган дастлабки бир миллион йил ичида нималар юз берганини аниқлаштиради ва ердан ташқаридаги ҳаёт изларини қидиради.