Россия Мудофаа вазирлиги томонидан 5 декабрь куни берилган ракета зарбалари оқибатида тўрт киши ҳалок бўлди. Бу ҳақда урушнинг 285-куни якунлари бўйича Украина президенти Владимир Зеленскийнинг мурожаатида айтилади.
«Бугунги кун ҳақида ҳисобот бераман. Асосий натижа — 70 та Россия ракетаси учирилди, кўпчилиги уриб туширилди. ‘Калибрлар’, Х-101 ва ҳоказо. «Шарқ», «Жануб» ва «Марказ» ҳаво қўмондонликларимиз жангчилари шарофати билан. Баракалла! Шерикларимизга ҳам раҳмат — биз ҳозир ишлатаётган ҳаво ҳужумига қарши мудофаа тизимлари учун. Россиянинг ҳар битта уриб туширилган ракетаси — террорни енгиш мумкинлигини исботловчи далилдир. Аммо, афсуски, ҳозирча осмонимизнинг тўлиқ хавфсизлигинини таъминлай олмаймиз — бир нечта нишонларга бориб урилган. Афсуски, қурбонлар бор», — деди Зеленский.
Россиянинг Украинадаги кўплаб ҳудудларда энергетика инфратузилмасига берган ракета зарбаларидан кейин электр энергиясини авариявий ўчириб қўйишни бошлашга тўғри келди, деди президент. Унинг сўзларига кўра, 5 декабрь куни кечқурун Винница, Киев, Житомир, Днепропетровск, Одесса, Хмелница ва Черкасси вилоятларида энг кўп ўчишлар кузатилган. Шунингдек, қўшни Молдовада ҳам электр билан боғлиқ узилишлар кузатилган.
Октябрь бошидан буён Россия Мудофаа вазирлиги Украина ҳудудига оммавий ракета зарбалари бериб, ҳарбий ва муҳим инфратузилма объектларига ҳужум қилмоқда. Натижада Украинадаги йирик иссиқлик ва гидро электр станцияларининг барчасига зарар етди.
Изоҳ (0)