Ўзбекистонда декабрь ойининг бошиданоқ қор ёғмоқда ва ҳарорат минус даражага тушиб кетди. Бунинг ортидан табиий газ босими тушиб, электр энергиясида узилишлар кузатилмоқда.
Тошкент шаҳри ҳокимлиги энергия ресурслари етишмовчилиги ортидан газ қуйиш шохобчаларини номаълум муддатга ёпди. Табиийки, ушбу жараёнда жамоат транспортига юкламалар ортмоқда.
Хўш, қишнинг изғирин ва ёғингарчиликка бой кунларига пойтахт қанчалик тайёр? Коммунал, йўл ва энергия етказиб бериш хизмати-чи? Мавзу юзасидан Тошкент аҳолисининг айрим вакилларига юзландик.
Мазкур сўровномада иштирок этган фуқаролардан бирининг таъкидлашича, қишга энди тайёрланишаётган бўлса керак, чунки газни ҳам ўчириб туришибди. Бензинда юрибмиз деб, таксилар ҳам қимматлашиб кетганини айтди.Фуқаролардан бири эса пойтахт ҳали тайёр эмас эканини, танишларининг уйида 4-5 кундан бери газ йўқлигини, ўзининг уйига эса эҳтиёт чора сифатида қўшимча иситиш асбобларини олиб келиб қўйганини қайд этди.
Фуқароларнинг айримлари эса пойтахт тайёр бўлмаса ҳам, аҳолининг ўзи шароит яратиб олади деган фикрда. Улардан бири «қор сабаб йўлларда тирбандликлар кўпайиб, одамлар иш ва ўқишга кеч қолади» деб, ҳали қишга тайёр эмас эканини таъкидлади.
«Шаҳар тайёр, фақат таксилар тайёр эмас экан, такси чақирсак келмаяпти», — дейди йўловчи аёл.
Изоҳ (0)