Бош вазир ўринбосари — инвестициялар ва ташқи савдо вазири Жамшид Хўжаев АҚШнинг Ўзбекистондаги янги элчиси Жонатан Хеник билан музокаралар ўтказди. Томонлар сармоявий, савдо-иқтисодий соҳалардаги икки томонлама ҳамкорликнинг долзарб масалаларини муҳокама қилди.
Жамшид Хўжаэв, аввало, Жонатан Хеникни янги лавозими билан табриклаб, касбий фаолиятида муваффақиятлар тилади. Суҳбат чоғида икки томонлама ҳамкорлик масалаларини биргаликда ҳал этиш платформаларининг самарадорлиги, хусусан, 2021 йил декабрь ойида биринчи учрашуви бўлиб ўтган Стратегик шериклик мулоқоти салоҳияти юзасидан фикр алмашилди.
Шунингдек, минтақавий кун тартиби бўйича, жумладан, Марказий Осиёда тинчлик, барқарорлик ва фаровонликни мустаҳкамлашнинг самарали ва муҳим воситасига айланган «C5+1» ташаббуси доирасида яқин ҳамкорликни давом эттиришга иккала мамлакатнинг содиқлиги алоҳида таъкидланди.
Шу билан бирга, учрашув иштирокчилари давлатнинг иқтисодиётдаги иштирокини қисқартириш, божхона маъмуриятчилигини такомиллаштириш, техник жиҳатдан тартибга солиш ва интеллектуал мулк ҳуқуқларини таъминлаш масалаларини назарда тутган ҳолда Ўзбекистоннинг ЖСТга аъзо бўлиши жараёнининг бугунги ҳолатини кўриб чиқди. АҚШ томони Ўзбекистонга ташкилотга аъзо бўлиш жараёнида ёрдам беришда давом этишга тайёрлигини билдирди.
Ўзбекистон ва Халқаро тараққиёт молия корпорацияси (DFC) ўртасида энергетика, транспорт, таълим, соғлиқни сақлаш соҳаларидаги ҳамкорлик доирасида аввал эришилган келишувларни амалга оширилиши, DFC молиялаштирган ДХШ лойиҳаларини ҳаётга татбиқ этиш масалалари муҳокама қилинди. Томонлар ушбу йўналишдаги ҳамкорликни кенгайтириш имкониятларини кўриб чиқишга келишиб олди.
Музокараларда муҳокама қилинган бошқа мавзулар қаторида тўқимачилик соҳасидаги ҳамкорлик истиқболлари ҳам ўрин олди. Шу нуқтаи назардан Ўзбекистон тўқимачилик маҳсулотларини АҚШ бозорига экспорт қилиш учун имтиёзли савдо режимини жорий қилиш истиқболлари муҳокама қилинди.
Суҳбат якунида икки томонлама кун тартибининг устувор йўналишлари бўйича яқин ҳамкорликни давом эттиришга ўзаро содиқлик билдирилди.
Мавзуга доир:
- «Биз учун ЖСТга қўшилиш мутлақ устувор вазифа» – ташқи савдо вазири ўринбосари Бадриддин Обидов
- Ўзбекистон ЖСТга аъзо бўлиш учун фаол музокаралар олиб бормоқда – Инвестициялар ва ташқи савдо вазирлиги
- Ўзбекистоннинг Жаҳон савдо ташкилотига қўшилиш жараёни жадаллаштирилади
- АҚШ Ўзбекистонни ЖСТга аъзо бўлиш жараёнида қўллаб-қувватлашни давом эттиради
Изоҳ (0)