Уругвай терма жамоаси ҳимоячиси Хосе Хименес 15 ўйинга дисквалификация қилиниши мумкин.
Футболчи ЖЧ—2022 3-тури доирасида кечган Ганага қарши ўйиндан кейин бош ҳакам Даниэль Зибертга яқинлашиш чоғида ФИФА директорларидан бирига тирсак билан зарба берган.
Бундан ташқари «Атлетико» футболчиси ҳакамларни ҳақорат қилган ва бу эфирга тушиб қолган.
Mundo Deportivo нашрининг хабар қилишича, ушбу ҳолат ўйин қайдномасига туширилган бўлса, ФИФА футболчини 15 та ўйингача дисквалификация қилиши мумкин. Бунда директор ўша учрашувга масъул шахслар қаторидан жой олган бўлиши керак бўлади. Агар бундай бўлмаса, дисквалификация муддати учта ўйинни ташкил қилади.
Шунингдек, Хименес спортчилар хос бўлмаган ҳаракати ва ҳақоратли сўзлари туфайли камида тўртта ўйинга четлатилиши мумкин.
Қайд этилишича, дисквалификация фақат Уругвай эмас, «Атлетико»даги ўйинлар ҳам татбиқ этилиши мумкин.
Эслатиб ўтамиз, учрашувда ҳакамлар Уругвай фойдасига иккита пенальтини бермади. Бу эса жамоада норозилик келтириб чиқарди.
Изоҳ (0)