Ёшлар ва тадбиркор аёллар юқори салоҳиятга эга: ОТБ урушнинг Марказий Осиёдаги бизнесга таъсири бўйича ҳисобот тақдим қилди

Россия—Украина можаросининг Марказий ва Ғарбий Осиёдаги кичик бизнесга таъсири минтақанинг тадбиркорлик базасини мустаҳкамлаш бўйича такомиллаштирилган стратегиялар зарурлигини кўрсатади. Бу ҳақда Осиё тараққиёт банкининг (ОТБ) янги ҳисоботида келтирилади. 

Марказий ва Ғарбий Осиёда хусусий секторда кичик ва ўрта корхоналар муҳим рол ўйнайди. 2021 йилгача мавжуд маълумотларга кўра, улар барча корхоналарнинг 98,9 фоизини, ишчи кучининг 46,1 фоизини, ишлаб чиқаришнинг 40,7 фоизини ва жами экспортнинг ўртача учдан бир қисмини (32,4 фоизини) ташкил этган. 

Марказий ва Ғарбий Осиёдаги ҳукуматлар кичик ва ўрта бизнес ташқи савдосини қўллаб-қувватлаш, шунингдек, ички товар бозорларини ривожлантириш бўйича ўз стратегияларини яхшилашлари керак, — дейди ОТБ бош иқтисодчиси Алберт Парк. 

Унинг сўзларига кўра, ўсишга йўналтирилган тадбиркорларни қўллаб-қувватлаш янги самарадорлик имкониятларини очишга ёрдам беради. 

Бу қўллаб-қувватлаш ёшлар, аёллар, агробизнес ва технологик стартапларга қаратилган бўлиши керак, — дейди Парк

Ҳисоботга кўра, кичик ва ўрта компанияларни халқаролаштириш ва инновацияларни рағбатлантириш иқтисодиётнинг тикланишини тезлаштиришга ҳамда инклюзив, барқарор ўсишга эришишга ёрдам беради. 

Ёшлар ва тадбиркор аёллар минтақадаги меҳнат бозорларини яхшилаш ва инклюзив ўсишни жадаллаштириш салоҳиятига эга, — дейилади ҳисоботда. 

Шунингдек, рақамли кўникмалар ва инфратузилмани янгилаш кичик бизнесни молиялаштириш манбаларини диверсификация қилиш билан бир қаторда муҳим аҳамиятга эга. 

Минтақада кичик ва ўрта бизнесни кредитлаш бозори кичиклигича қолмоқда. 2015—2021 йилларда кичик ва ўрта ва хусусий тадбиркорлик субъектларига банк кредитлари ўртача ялпи ички маҳсулотнинг 9 фоизини ва жами банк кредитларининг 31,4 фоизини ташкил этди.

Кичик кредит бозорлари ҳукуматларни кичик ва ўрта бизнесга молиявий ёрдам кўрсатишга ундади. 

Сиёсат муҳокамасининг диққат марказида субсидиялар билан қўллаб-қувватланадиган молияга катта боғлиқликдан бозорга асосланган молияга — капитал бозорлари ва рақамли молиявий платформаларга ўтиш бўлиши керак, — дейилади ҳисоботда.