Қирғизистоннинг Первомайск туман судига 2010 йил Ўш воқеалари бўйича президент Садир Жапаров, Миллий хавфсизлик давлат қўмитаси раҳбари Қамчибек Ташиев, депутат Талант Мамитов ва сиёсатчи Ахматбек Келдибеков гувоҳ сифатида чақирилди. Бу ҳақда Спутник хабар берди.
Бу айбланувчи, собиқ Миллий хавфсизлик давлат қўмитасининг раҳбари, Кенешбек Дуйшебаевнинг илтимосига кўра амалга оширилган. Бундан 12 йил аввал ёзда, апрель воқеаларидан кўп ўтмай, Қирғизистон жанубида қирғиз ва ўзбеклар ўртасида этник тўқнашув келиб чиққан ва бунинг оқибатида 400 дан ортиқ одам ҳалок бўлган. Муваққат ҳукумат аъзолари ўша воқеалар пайтида мансаб ваколатларини суиистеъмол қилганликда айбланмоқда. Терговнинг ўзи 2021 йилда қайта ишга тушган.
1 декабрь кунги суд мажлисида айбланувчилар қаторида Қирғизистон собиқ президенти Алмазбек Атамбаев ҳам иштирок этди. У тез ёрдам машинасида ҳарбийлар ҳамроҳлигида судга олиб келинган, бироқ кўрсатма беришдан бор тортиб, «циркда» қатнашмаслигини айтган. Шундан кейин у суд залидан олиб чиқилган.
Июнь воқеалари айбланувчиларнинг ҳеч бири ўз айбига иқрор бўлмган. Бундан ташқари, суд мажлисида собиқ мудофаа вазири Исмоил Исоқов ва собиқ ИИВ ўринбосари вазифасини бажарувчи, Жалолобод ва Ўш вилоятлари коменданти Бактибек Алимбеков иштирок этган. Прокурор айблов хулосасини ўқиб чиққан, бироқ залда ҳозир бўлган судланувчиларнинг ҳеч бири ўз айбига иқрор бўлмаган.
Изоҳ (0)